GAROWE – Wasiiru dowlaha Madaxtooyada Puntland, Cabdifataax Abdinur, ayaa si kooban oo macno leh uga falceliyey war-saxaafadeedkii dowladda federaalka Soomaaliya kasoo saartay markabkii lagu qabtay xeebaha Puntland ee lagu eedeeyey inuu hub sharci darro ah siday.
Cabdifataax ayaa qoraal uu soo dhigay baraha bulshada ku yiri: “Hadda ayuu xalaal noqday”, isagoo si toos ah u muujiyey in Puntland aysan ku qanacsaneyn sida Villa Somalia u fasirtay arrinta markabka. Hadalkaas ayaa kusoo aadaya kadib markii dowladda Federaalka ay sheegtay in markabku sharciyeysan yahay, taasoo keentay dhaleeceyn kasoo yeertay madaxda Puntland.
Markabkan oo lagu magacaabo SEA WORLD ayaa la qabtay dhowaan, waxaana Puntland ay sheegtay inuu siday hub iyo agab ciidan oo aan sharciyeysneyn. Maamulka Puntland wuxuu horey u sheegay in falkaasi uu yahay mid lidi ku ah amniga gobollada iyo heshiisyada caalamiga ah ee la xiriira xakameynta hubka.
