Wararka24: 21-02-2026 Madaxweynihii hore ee Somaliland, Muuse Biixi Cabdi, ayaa ku baaqay in xukuumadda talada haysa ay si cad u soo bandhigto faahfaahinta heshiiska la sheegay in uu horseeday aqoonsiga ay Israa’iil siisay Somaliland.
Muuse Biixi ayaa farriin muuqaal ah ku sheegay in aan la qaadi karin tallaabo kasta oo ka hor imanaysa dastuurka Somaliland iyo mabaadi’da diinta Islaamka. Wuxuu carrabka ku adkeeyay in Somaliland aysan taageeri doonin wax falal ah oo dhibaato u keenaya Muslimiinta, isla markaana aysan ka faa’iideysan doonin dhibaatada haysata bulsho Muslim ah.
Madaxweynihii hore ayaa xusay in aan weli si rasmi ah loo shaacin qodobada heshiiska lala galay Israa’iil, isagoo dalbaday in si furan loo caddeeyo wixii lagu heshiiyay. Wuxuu sheegay in haddii ay soo baxdo in heshiisku dhaawacayo dastuurka, diinta ama danaha Somaliland, uu fagaare uga hadli doono.
Israa’iil ayaa noqotay dalka kaliya ee si rasmi ah u aqoonsaday Somaliland, tallaabadaas oo ay si kulul u cambaareeyeen Dowladda Federaalka Soomaaliya, dalal Afrikaan ah iyo kuwo Muslimiin u badan. Dowladda Soomaaliya ayaa sheegtay in aqoonsigaas uu khatar ku yahay midnimada iyo madax-bannaanida dhuleed ee dalka.
Xukuumadda Somaliland ayaa horay u beenisay warar sheegaya in heshiiska lala galay Israa’iil uu ku jiro qorshe lagu martigelinayo qaxooti Falastiiniyiin ah ama lagu siinayo saldhig milatari, iyadoo sheegtay in eedeymahaas aysan sal lahayn. Doodda ku saabsan nuxurka heshiiska ayaa weli ka socota gudaha Somaliland, iyadoo culimo, siyaasiyiin iyo qeybaha bulshada ay muujinayaan aragtiyo kala duwan.
Midowga Afrika iyo dalal dhowr ah oo gobolka ah ayaa sidoo kale ka falceliyay aqoonsiga Israa’iil ee Somaliland, iyagoo ugu baaqay Tel Aviv inay dib uga laabato go’aankaas, kuna adkeeyay in la ixtiraamo midnimada dhuleed ee Jamhuuriyadda Federaalka Soomaaliya.
DAAWA
