Wararka24: Maxkamad ku taalla deegaanka Kahawa ayaa xukun 10 sano oo xabsi ah ku ridday nin Soomaali ah oo lagu magacaabo Cabdikariim Xasanow Xasan, kadib markii lagu helay dambiyo la xiriira kooxda Al-Shabaab.
Sida lagu sheegay war kasoo baxay Office of the Director of Public Prosecutions Kenya, eedeysanaha ayaa lagu helay inuu si toos ah uga mid ahaa, isla markaana taageero siinayay ururka Al-Shabaab oo dowladda Kenya u aqoonsan urur argagixiso.
Dacwad-oogayaasha ayaa maxkamadda u sheegay in Cabdikariim uu door muuqda ka qaatay qorista dhalinyaro cusub oo lagu biirinayay kooxda, isaga oo la sheegay inuu ku qancin jiray inay ku biiraan ururkaasi.
Sidoo kale, maxkamaddu waxay caddeysay in eedeysanaha uu abaabuli jiray kulamo lagu taageerayo Al-Shabaab, kuwaas oo lagu faafinayay fikradaha xagjirka ah iyo qorshayaal la xiriira howlaha kooxda.
Cabdikariim, oo sidoo kale loo yaqaan Cali, ayaa lagu helay inuu fududeeyay safarro ay dhalinyaro uga ambabaxayeen gobolka Migori County si loogu qaado gudaha Soomaaliya, halkaas oo ay ugu biiri lahaayeen kooxda.
Intii ay socotay dhageysiga dacwadda, maxkamaddu waxay dhegeysatay afar marqaati oo si faahfaahsan uga hadlay doorka eedeysanaha, iyadoo garsooraha Boaz Ombewa uu sheegay in caddeymaha la keenay ay muujinayaan lugtiisa tooska ah ee arrintan.
Garsooraha ayaa ugu dambeyn amray in xukunada lagu riday eedeysanaha ay noqdaan kuwo isla socda, taas oo ka dhigan inuu wada qaadan doono muddada 10-ka sano ah ee xabsiga lagu xukumay.
