Wararka24: Agaasimihii hore ee hay’adda sirdoonka dibadda ee UK Sir Alex Younger ayaa sheegay in Iiraan ay haatan u muuqato mid gacanta sare ku leh dagaalka ay kula jirto Mareykanka iyo Israa’iil.
Younger ayaa wareysi uu siiyay warbaahinta ku sheegay in Mareykanku uu dhayalsaday baaxadda dagaalka, taas oo keentay in uu waayo hoggaaminta jihada colaadda.
Wuxuu tilmaamay in Iiraan ay muujisay adkeysi iyo istaraatiijiyad wax ku ool ah, gaar ahaan markii ay kala firdhisay awooddeeda milateri si ay uga hortagto duqeymaha.
Sidoo kale wuxuu xusay in dagaalka uu u noqday Iiraan mid ay u aragto arrin la xiriirta jiritaankeeda, halka Mareykanka uu u arko dagaal doorasho ah, taas oo saameyn ku yeelatay niyadda iyo istaraatiijiyadda labada dhinac.
Younger ayaa sheegay in Iiraan ay si xeeladeysan u isticmaashay saameynta ay ku leedahay Marinka Hormuz, taas oo ka dhigtay colaadda mid saameyn ku yeelata suuqyada tamarta caalamka.
Dhanka kale, warar kale ayaa muujinaya in gudaha Mareykanka ay jiraan walaacyo ku saabsan istaraatiijiyadda dagaalka, iyadoo qaar ka mid ah siyaasiyiinta ay sheegeen in aan si cad loo qeexin ujeeddooyinka milatari.
Hadalkan ayaa kusoo aadaya xilli dagaalka Bariga Dhexe uu marayo marxalad xasaasi ah, iyadoo ay jirto cabsi laga qabo in uu sii fido.
DAAWA
