Maamulka Puntland ayaa maanta shaaciyay in deegaanada SSC-Khaatumo ay weli ka tirsan yihiin dhulkooda, iyadoo dowladda federaalka ay horay u aqoonsatay Khaatumo inay tahay maamul goboleed.
Wasiirka Warfaafinta Maamulka Puntland Maxamuud Caydiid Dirir ayaa sheegay in dhammaan degaanada SSC ay dastuur ahaan ka tirsan yihiin Puntland.
“SSC dastuuriyan waa dhul ka tirsan Puntland, meel ay kaga baxday ma jirto,” ayuu yiri Dirir.
Wasiirka ayaa xusay in Puntland markii la dhisayay ay ku dhisnayd heshiis bulsho, waxaanu sheegay in aysan jirin meel lagu kala baxay dastuurka.
“Dastuurka lama furin,” ayuu ku daray.Hadalkani wuxuu ka hortagayaa aqoonsiga dowladda federaalka ay October 2023 siisay maamulka SSC-Khaatumo.
Dowladda dhexe ayaa SSC-Khaatumo u aqoonsatay inay tahay maamul goboleedka lixaad ee Soomaaliya.
Maamulka SSC-Khaatumo ayaan weli ka jawaabin hadalka Puntland. Muddo ayay jireen khilaafyo u dhexeeya labada maamul oo deris ah.
Wasiir Dirir oo deegaan ahaan kasoo jeeda gobolada SSC ayaa hadalkan yidhi xilli xiisado siyaasadeed ka taagan yihiin xadka labada maamul.
SSC-Khaatumo waxay nafsaddeeda ku sheegaysaa inay tahay maamul goboleed ka madax bannaan Maamulka Puntland iyo Somaliland. Waxay xukuntaa degmooyinka Laascaanood, qaybo ka mid ah Sool, Sanaag iyo Cayn.
Dowladda federaalka ayaa April 2025 xaqiijisay inay SSC-Khaatumo u aqoonsanayso maamul goboleed buuxa. Ra’iisul wasaare Xamse Cabdi Barre ayaa booqasho ku tagay Laascaanood.