Wararka24: Kubadda casriga ah ee loo adeegsado tartamada waaweyn ee kubadda cagta sida Koobka Adduunka sannadkan ayaa maanta noqotay qalab tiknoolajiyadeed oo ka baxsan shaqadeedii caadiga ahayd.Magaceeda waxaa la dhahaa Adidas Trionda, waana kubadda rasmiga ah ee tartanka 2026, waxay gudaha ku sidataa batari iyo qalab dareemaya dhaqdhaqaaqa laacibiinta.
In batarigeedu buuxsamo wuxuu qaataa wax ka badan lix saacadood. Mid ka mid ah arrimaha dad badan la yaabka ku noqday ayaa ah in kubada lagu dallaco koronto kahor inta aysan ciyaaruhu bilaaban.
Kubaddan ayaa gudaha ku sidata qalab dareeme iyo tiknoolajiyad awood u leh inay cabbirto dhaqdhaqaaqa kubadda xilli kasta oo ciyaarta ah. Qalabkan ayaa ururiya xog ku saabsan xawaaraha, wareegga, jihada iyo waqtiga saxda ah ee kubadda la taabtay.
Xogta laga helo kubadda ayaa si toos ah loogu diraa nidaamyada garsoorka ee casriga ah, kuwaas oo ka caawiya go’aaminta xaaladaha adag sida offside-ka iyo dhacdooyinka kale ee muranka dhaliya. Tiknoolajiyadan ayaa yareysay khaladaadkii hore uga dhici jiray go’aannada garsoorka.
Horumarkan ma ahan mid cusub. Koobkii Adduunka ee Qatar 2022 ayaa markii ugu horreysay si weyn loogu adeegsaday kubad sidata qalab dareeme, taas oo qayb ka noqotay nidaamka offside-ka ee nus-otomaatiga ah. Tan iyo xilligaas waxaa la sii waday horumarinta tiknoolajiyada ku dhex jirta kubadaha.
Shirkadaha soo saara kubadaha ayaa dadaal badan geliya sidii qalabka elektaroonigga ah ee gudaha ku jira uusan u saameyn duullimaadka, boodista ama dareenka kubadda marka ay ciyaartoydu laadayaan. Tijaabooyin badan ayaa lagu sameeyaa si loo xaqiijiyo in kubaddu sii haysato tayadeedii ciyaareed.
Khubarada kubadda cagta ayaa aaminsan in tiknoolajiyadan ay wax weyn ka beddeshay hufnaanta ciyaaraha waaweyn, maadaama ay garsoorayaasha siiso xog sax ah oo ku saabsan dhacdooyinka garoonka ka dhaca. Taasi waxay sare u qaadday kalsoonida lagu qabo go’aannada lagu gaarayo tartamada caalamiga ah.
Si kastaba, marka taageerayaashu daawanayaan xariiqyada offside-ka ee shaashadaha ka muuqda, waxaa muhiim ah in la ogaado in kaamirooyinka oo keliya aysan shaqada qaban. Kubadda lafteeda ayaa maanta noqotay qayb muhiim ah oo ka mid ah nidaamka tiknoolajiyadda ee hagaya garsoorka casriga ah.
