Wararka24: Garsooraha Soomaaliyeed Cumar Cabdulqaadir Cartan ayaa helay fursad weyn oo cusub, kadib markii Xiriirka Kubadda Cagta Yurub ee UEFA uu ku dhawaaqay in uu dhex-dhexaadin doono ciyaarta finalka Super Cup-ka Yurub ee dhex mari doonta kooxaha Paris Saint-Germain iyo Aston Villa.
Magacaabistan ayaa timid maalmo kadib markii Cartan looga hor istaagay inuu galo dalka Mareykanka, taas oo keentay inuu seego ka qeybgalka hawlihii la xiriiray Koobka Adduunka ee FIFA. Arrintaas ayaa dhalisay falcelin ballaaran oo ka timid bahda kubadda cagta iyo taageerayaal badan oo caalamka ku kala nool.
UEFA ayaa sheegtay in magacaabista Cartan ay qeyb ka tahay iskaashi cusub oo ay la leedahay Xiriirka Kubadda Cagta Afrika ee CAF, kaas oo lagu horumarinayo garsoorka iyo wada shaqeynta labada dhinac. Sida lagu sheegay bayaan rasmi ah, labada hay’adood waxaa ka go’an horumarinta qiyamka sinnaanta, midnimada iyo takoor la’aanta.
Madaxweynaha UEFA, Aleksander Čeferin, ayaa ku ammaanay garsooraha Soomaaliyeed xirfaddiisa iyo dadaalka uu muujiyay sanadihii la soo dhaafay. Wuxuu sheegay in Cartan uu ka mid yahay garsoorayaasha ugu wanaagsan Afrika, isla markaana uu mudan yahay fursaddan muhiimka ah.
Cumar Cartan ayaa sanadihii dambe sumcad weyn ku yeeshay garsoorka kubadda cagta, isaga oo hoggaamiyay kulamo heer sare ah oo qaaradda Afrika ka dhacay. Sidoo kale waxaa loo aqoonsaday mid ka mid ah garsoorayaasha ugu tayada wanaagsan Afrika.
Magacaabistan cusub ayaa si weyn loogu soo dhaweeyay gudaha Soomaaliya iyo guud ahaan bahda isboortiga. Taageerayaal badan ayaa ku tilmaamay tallaabadan mid muujinaysa kalsoonida lagu qabo kartida iyo hufnaanta garsooraha Soomaaliyeed.
Ciyaarta Super Cup-ka Yurub ayaa la filayaa inay bisha Agoosto ka dhacdo magaalada Salzburg, iyadoo indhaha taageerayaasha kubadda cagta ay si gaar ah ugu jeedsan doonaan garsoore Cumar Cartan oo markale matalaya Soomaaliya fagaaraha caalamiga ah.
