Wararka24: Guddiga madaxa bannaan ee doorashooyinka Koonfur Galbeed ayaa saq dhexe xalay shaaciyay liiska xildhibaannada cusub ee Baarlamaanka saddexaad ee maamulkaasi.
Guddiga ayaa sheegay in 95 mudane oo cusub ay soo xuleen odayaasha dhaqanka, isla markaana ay buuxiyeen shuruudaha dastuuriga ee looga baahan yahay xubinnimada Baarlamaanka.
Qoraalka ayaa sidoo kale lagu faahfaahiyay magacyada xildhibaannada iyo beelaha ay ka soo jeedaan ee ku nool deegaannada Koonfur Galbeed.
Xildhibaannadan cusub ayaa la filayaa in maanta la dhaariyo, kadibna ay yeeshaan kulankooda ugu horreeya oo ay ku dooranayaan guddoon kumeel gaar ah oo hoggaamiya ilaa laga soo doorto guddoonka rasmiga ah.
Guddiga doorashooyinka ayaa sidoo kale qorsheeyay in 29ka Maarso la qabto araajida musharraxiinta guddoonka Baarlamaanka, taas oo ay ku xigi doonto doorashada guddoonka iyo tan madaxweynaha.
Madaxweyne Cabdicasiis Lafta-gareen ayaa dhawaan magacaabay guddigan oo ka kooban sagaal xubnood, waxaana guddoomiye looga dhigay Shuceyb Nuur Xuseen.
Arrintan ayaa imanaysa xilli uu jiro muran siyaasadeed oo u dhexeeya maamulka Koonfur Galbeed iyo mucaaradka, kaas oo ku saabsan hannaanka doorashooyinka.
Xiisadda ayaa weli taagan, iyadoo laga cabsi qabo inay isku beddesho iska horimaadyo horleh.
