Wararka24: Magaalada Muqdisho ayaa waxaa kusoo kordhay qaab cusub oo ay adeegsanayaan kooxo tuugo ah oo lagu eedeeyay inay iska dhigaan xubno ka tirsan Hay’adda Nabadsugidda iyo Sirdoonka Qaranka (NISA), si ay u dhacaan shacabka.
Sida ay sheegeen laamaha amniga iyo Maxkamadda Ciidamada Qalabka Sida, waxaa muddooyinkii u dambeeyay kordhay cabashooyinka la xiriira dad lagu dhacay magaca hay’adaha amniga, gaar ahaan NISA. Kooxahan ayaa la sheegay inay adeegsadaan xeelado cusub oo ka duwan hababkii hore ee dhaca.
Wararka ayaa tilmaamaya in kooxahan ay bartilmaameedsadaan dadka wata taleefannada casriga ah ama loo arko inay lacag haystaan. Waxay isku sheegaan saraakiil amni, iyagoo ku andacoonaya inay wadaan baaritaanno la xiriira amniga ama tuhuno argagixiso.
Dhibbanayaasha ayaa la farayaa inay wareejiyaan taleefannadooda iyo furaha sirta ah, iyadoo loogu sheegayo in la baarayo xogta ku jirta. Sidaas ayay kooxahaasi ku helaan fursad ay uga xadaan lacagaha ku jira adeegyada elektaroonigga ah ama ay uga qaataan agab kale oo ay wataan.
Laamaha amniga ayaa sheegay in kooxahaasi inta badan aysan xirneyn darees rasmi ah, balse ay ku labistaan dhar shacab oo u eg kuwa ay xirtaan qaar ka mid ah ciidamada amniga, taas oo shacabka ku abuureysa kalsooni ama cabsi ay ku hoggaansamaan amarrada loo jeedinayo.
Mas’uuliyiinta amniga ayaa ugu baaqay shacabka inay taxaddar dheeraad ah muujiyaan, ayna hubiyaan aqoonsiga qof kasta oo sheeganaya inuu ka tirsan yahay hay’adaha amniga. Waxay sidoo kale ku booriyeen muwaadiniinta inaysan taleefannadooda ama xogtooda gaarka ah ku wareejin cid aan si rasmi ah loo aqoonsan.
Laamaha amniga ayaa xusay in baaritaan kasta oo sharci ah lagu sameeyo goobaha rasmiga ah ee amniga ama baraha koontaroolka ee la yaqaan. Waxay shacabka ugu baaqeen in qofkii la kulma dhacdo noocan oo kale ah uu si degdeg ah ugu wargeliyo saldhigga booliska ee ugu dhow ama laamaha amniga, si tallaabo sharci ah looga qaado kooxaha ku howlan falalkan.
