Wararka24: Xasan Jeneraal Yuusuf Maxamed Siyaad (Indhacadde), oo kamid ah saraakiishii hore ee Ciidanka Xoogga Dalka, ayaa ka hadlay xaaladda siyaasadeed ee Soomaaliya. Wuxuu farriin u diray siyaasiyiinta mucaaradka iyo hoggaanka dowladda.
Indhacadde oo ka qayb-galay munaasabad ka dhacday Muqdisho ayaa dalab xasaasi ah u diray siyaasiyiinta mucaaradka, isagoo ugu baaqay inay tanaasul sameeyaan, isla markaana Madaxweynaha ay u daayaan halka sano ee loo kordhigay, kadib ansixiintii Dastuurka cusub oo ay meel mariyeen labada Gole.
“Mucaaradka waxaan leeyahay Madaxweynaha halka sano u daaya, Madaxweynahana waxaan leeyahay doorasho heshiis lagu yahay ha qabto,” ayuu yiri Jeneraal Yuusuf Indhacadde
Dhanka kale wuxuu Madaxweynaha ugu baaqay in uu qabto doorasho lagu heshiis yahay oo ka hortagta kala qaybsanaan siyaasadeed. Wuxuu sheegay in heshiis siyaasadeed uu muhiim u yahay badbaadada dowladnimada. Wuxuu ka digay in khilaafyada socda ay sababi karaan qalalaase.
Wuxuu sidoo kale ku booriyay madaxda dalka inay ka fogaadaan danaysi siyaasadeed isla markaana ay u shaqeeyaan shacabka si cadaalad ah. Wuxuu carrabka ku adkeeyay in hoggaan wanaagsan uu ku yimaado heshiis iyo kalsoonida shacabka.
Hadalkan ayaa kusoo beegmaya xilli Muqdisho ay ka jiraan xiisado siyaasadeed iyo kala aragti duwanaansho u dhexeeya Villa Soomaaliya iyo mucaaradka. Soomaaliya ayaa marar badan wajahday khilaafyo siyaasadeed xilliyada kala guurka kuwaas oo saameyn ku yeeshay hannaanka dowladnimada.
Wuxuu ugu dambeyn ku adkeeyay in dhammaan dhinacyada siyaasadda ay ka shaqeeyaan wada-hadal joogto ah si loo xoojiyo nabadda iyo dowladnimada. Wuxuu tilmaamay in heshiis siyaasadeed oo ballaaran uu muhiim u yahay xasilloonida mustaqbalka dalka iyo in laga hortago khilaafyo soo noqnoqda
