Wararka24: Safiyo Cali oo ahayd hooyo dhashay 11 carruur ah ayaa maanta ku geeriyootay isbitaal ku yaalla magaalada Muqdisho, kadib dhaawacyo culus oo ka soo gaaray dab la sheegay in ninkeeda uu ku gubay habeenkii Arbacada
Sida ay sheegeen eheladeeda, marxuumadda ayaa lagu dhaawacay gurigeeda oo ku yaalla xaafadda Suuqa Xoolaha ee degmada Heliwaa habeenkii Arbacada. Eheladu waxay sheegeen in falkaasi lagu eedeynayo ninkeeda, Sayid Cumar.
Qoyska ayaa sheegay in Safiyo Cali ay saacadihii iyo maalmihii la soo dhaafay ku jirtay xaalad caafimaad oo aad u liidata, iyadoo lagu daweynayay isbitaal ku yaalla Muqdisho. Ugu dambeyn ayay maanta u geeriyootay dhaawacyadii ka soo gaaray gubashada.
Wararka la helayo ayaa tilmaamaya in labada lamaane uu muddooyinkii dambe u dhexeeyay khilaaf qoys, inkastoo aan si rasmi ah loo shaacin sababaha murankaasi salka ku hayay.
Sidoo kale, waxaa la sheegay in ninka lagu eedeeyay falka uu goobta ka baxsaday kadib dhacdada, iyadoo aan weli la shaacin halka uu ku sugan yahay. Hay’adaha ammaanka ayaan weli soo saarin war rasmi ah oo ku saabsan baaritaanka kiiskan.
Ehelada marxuumadda ayaa muujiyay murugo iyo caro ay ka qabaan geerida Safiyo Cali, iyagoo dalbaday in cadaaladda la horkeeno qofka lagu eedeeyay falkaasi.
Qoyska ayaa sidoo kale sheegay in aysan aqbali doonin wax heshiis ama mag ah, balse ay doonayaan in kiiska loo maro waddada sharciga, si loo helo caddaalad ku saleysan nidaamka garsoorka.
Dhacdadan ayaa si weyn looga hadal hayaa magaalada Muqdisho, iyadoo bulshada qaarkeed ay ku baaqayaan in la xoojiyo tallaabooyinka looga hortagayo rabshadaha ka dhanka ah haweenka iyo xallinta khilaafaadka qoysaska si waafaqsan sharciga.
