Is-afgarad hordhac ah ayaa laga gaaray in shirka wada-tashiga u dhexeeya Dowladda Federaalka Soomaaliya iyo Isbahaysiga Mucaaradka ee Golaha Mustaqbalka Soomaaliyeed lagu qabto Xarunta Madaxtooyada Soomaaliya, sida ay sheegayaan warar lagu kalsoon yahay.
Go’aankan ayaa yimid kaddib codsi uu gudbiyay Madaxweynaha Jamhuuriyadda Federaalka Soomaaliya, Xasan Sheekh Maxamuud, iyadoo labada dhinac ay muujiyeen dabacsanaan iyo tanaasul si loo abuuro jawi rasmi ah oo wadahadal.
Ilo xog-ogaal ah ayaa tilmaamay in weli ay socdaan wada-xaajoodyo farsamo oo lagu dhammaystirayo habraacyada shirka, si loo xaqiijiyo in kulanka uu si rasmi ah u qabsoomo maalmaha soo socda.
Shalay, Madaxweyne Xasan Sheekh Maxamuud ayaa kulan qado ah Hotel Decale kula qaatay siyaasiyiinta Golaha Mustaqbalka iyo xubnaha guddiga farsamo ee shirka wada-xaajoodka, waxaana kulankaas lagu muujiyay isku soo dhowaansho iyo dhisidda kalsooni labada dhinac ah.
Qadada kaddib, dhinacyada ayaa saxaafadda u xaqiijiyay in is-afgarad laga gaaray arrimo hore loogu kala aragti duwanaa, gaar ahaan goobta lagu qabanayo wada-hadallada.
Dhanka kale, Ra’iisul Wasaaraha Xukuumadda Federaalka Soomaaliya, Xamza Cabdi Barre, ayaa kulan gaar ah la yeeshay madaxweynayaasha Puntland iyo Jubbaland, Siciid Cabdullaahi Deni iyo Axmed Maxamed Islaam, kaas oo diiradda lagu saaray dardargelinta dadaallada lagu xaqiijinayo qabsoomidda shirka.
Is-afgaradka hordhaca ah ee laga gaaray goobta shirka ayaa loo arkaa tallaabo muhiim ah oo lagu yareynayo xiisadda siyaasadeed, isla markaana lagu abuurayo jawi u sahlaya in wada-hadalladu u furmaan si rasmi ah.
