Wararka24: Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta ka qeyb-galay salaadda janaasada Allaha u naxariistee Imaam Maxamed Yuusuf Cali oo lagu aasay magaalada Muqdisho, iyadoo ay ka qeyb-galeen mas’uuliyiin dowladda ka tirsan, duubabka dhaqanka iyo culumaa’udiin Soomaaliyeed.
Madaxweynaha ayaa sheegay in marxuumka uu door muuqda ku lahaa dadaallada nabadeynta, dib-u-heshiisiinta iyo mideynta bulshada Soomaaliyeed, isaga oo xusay in uu kaalin weyn ka qaatay xoojinta dowladnimada iyo dhismaha nabadda dalka.
Xasan Sheekh Maxamuud ayaa tilmaamay in dhaxalka wanaagsan ee uu ka tagay Imaam Maxamed Yuusuf Cali uu sii ahaan doono mid ay bulshada Soomaaliyeed ku xusuusan doonto, gaar ahaan kaalintii uu ku lahaa isu soo dhawaanshaha bulshada iyo xalinta khilaafaadka.
Madaxweynaha ayaa sidoo kale tacsi iyo tiiraanyo u diray qoyska, ehellada iyo guud ahaan shacabka Soomaaliyeed ee uu ka baxay marxuumka, isaga oo Alle uga baryay inuu hoygiisa ka yeelo Jannatul Firdowsa, islamarkaana uu siiyo samir iyo iimaan dhammaan dadka uu ka geeriyooday.
Allaha u naxariistee Imaam Maxamed Yuusuf Cali, oo ahaa Imaamka beesha Mudulood kana mid ahaa hoggaamiyeyaasha dhaqanka Soomaaliyeed ee ugu caansan, ayaa maalmo ka hor ku geeriyooday dalka Hindiya, halkaas oo muddooyinkii dambe lagu dabiibayay xaaladdiisa caafimaad.
Marxuumka ayaa muddo dheer ka shaqeynayay nabadeynta bulshada, xoojinta wadajirka iyo mideynta shacabka Soomaaliyeed, waxaana si weyn loogu xusuusan doonaa doorkii uu ka qaatay arrimaha dhaqanka, xalinta khilaafaadka iyo dadaalladii lagu taageerayay nabadda iyo wada noolaanshaha bulshada Soomaaliyeed.
