Wararka24: Xildhibaan Ilhaan Cumar oo ka tirsan Aqalka Wakiillada Maraykanka ayaa soo gudbisay qaraar ku baaqaya in Maraykanku si rasmi ah ugu biiro Maxkamadda Dambiyada Caalamiga ah ee ICC, isla markaana laga qaado cunaqabataynta iyo xayiraadaha fiisaha ee lagu soo rogay mas’uuliyiinta maxkamadda.
Qaraarkan ayaa yimid maalmo kadib markii Xoghayaha Arrimaha Dibadda ee Maraykanka, Marco Rubio, uu sheegay inuu doonayo in la wiiqo awoodda ICC. Hadalkaas ayaa dhaliyay falcelin siyaasadeed, iyadoo taageerayaasha maxkamaddu ay sheegeen in tallaabadaasi ay dhaawici karto caddaaladda caalamiga ah iyo isla xisaabtanka dambiyada culus.
Ilhaan Cumar ayaa sheegtay in ka hortagga isla xisaabtanka dambiyada waaweyn uu horseedi karo rabshado hor leh, isla markaana uu sii adkeyn karo colaadaha iyo xasillooni darrada. Waxay xustay in ICC ay door muhiim ah ka qaadato dacwadaha la xiriira dambiyada dagaalka, xasuuqa iyo dambiyada ka dhanka ah aadanaha marka waddan uusan awoodin ama uusan doonayn inuu baaritaan iyo dacwad ku qaado eedeysanayaasha.
Xildhibaannada ayaa ku dooday in haddii Maraykanku uu dhab ka yahay difaaca xuquuqda aadanaha iyo xoojinta ku dhaqanka sharciga, ay lagama maarmaan tahay inuu taageero hay’adaha caddaaladda caalamiga ah halkii uu wiiqi lahaa. Ilhaan Cumar ayaa sidoo kale ku adkeysatay in qofna uusan ka sarreyn sharciga.
Qaraarka ayaa waxaa taageeray xubno kale oo ka tirsan Xisbiga Dimuqraadiga ee Aqalka Wakiillada, kuwaas oo ay ka mid yihiin André Carson, Rashida Tlaib, Jesús “Chuy” García iyo Nydia Velázquez. Lama oga weli sida uu qaraarku uga gudbi doono Kongareeska, maadaama Maraykanku muddo dheer uusan xubin ka ahayn Maxkamadda Dambiyada Caalamiga ah, isla markaana ay jireen kala aragti duwanaansho siyaasadeed oo ku saabsan xiriirka Washington iyo ICC.
