Wararka24: Iran ayaa la sheegay inay farriin adag u dirtay Sacuudiga carabiya iyo Imaaraadka, taas oo ku saabsan jawaabteeda milatari ee ka dhalatay dagaalka ay kula jirto Mareykanka iyo Israel. Warbixinno laga helay ilo diblomaasiyadeed ayaa sheegaya in Tehran ay ka digtay weerarro culus oo ay ku beegsan karto Abu Dhabi haddii colaadda sii xoogeysato.
Digniintan ayaa kusoo beegmaysa xilli xiisadda gobolka ay gaartay heer sare, iyadoo dalalka Khaliijka ay wajahayaan culeys siyaasadeed iyo mid amni. Falanqeeyayaal ayaa sheegaya in Tehran ay isku dayeyso inay ka faa’iideysato kala aragti duwanaanta ka dhex jirta dalalkan.
Khilaafka u dhexeeya Sacuudiga iyo Imaaraadka ayaa sii balartay toddobaadyadii lasoo dhaafay, gaar ahaan kadib go’aankii Abu Dhabi uga baxday ururka OPEC. Tallaabadaas ayaa loo fasiray mid sii ballaarin karta kala fogaanshaha labada dal ee saameynta ku leh gobolka.
Wararka ayaa sidoo kale sheegaya in Imaaraadka uu sii xoojiyay xiriirka difaac iyo amni ee kala dhexeeya Israel iyo Mareykanka, iyadoo la sheegay in Tel Aviv ay u dirtay qalab difaac oo dheeraad ah. Arrintan ayaa sii kordhisay shakiga Tehran ee ku saabsan doorka Abu Dhabi ee colaadda.
Sacuudiga, inkastoo uu taageero siiyay qaar kamid ah howlaha Mareykanka, haddana wuxuu sii wadaa dadaallo diblomaasiyadeed oo lagu raadinayo xabbad-joojin iyo wada hadal. Riyadh ayaa ka walaacsan in dagaalku saameyn ku yeesho dhaqaalaha iyo amniga gobolka.
Xaaladda Bariga Dhexe ayaa weli kacsan, iyadoo dalalka gobolka ay ka cabsi qabaan in colaaddu isu beddesho dagaal ballaaran oo saameeya marinada shidaalka iyo xasilloonida guud ee gobolka.
