Wararka24: Madaxweynihii hore ee Puntland, ahna xildhibaan ka tirsan Aqalka Sare ee Baarlamaanka Federaalka Soomaaliya, Cabdiraxmaan Maxamed Faroole, ayaa dhaliilo culus u jeediyay Dowladda Federaalka Soomaaliya, isagoo sheegay in xaaladda siyaasadeed ee dalka ay ka leexatay hannaankii dastuuriga ahaa.
Faroole ayaa sheegay in aanay jirin dowlad sharci ah oo ka jirta Muqdisho, isagoo ku eedeeyay dowladda uu hoggaamiyo Madaxweyne Xasan Sheekh Maxamuud inay ku tumatay dastuurka isla markaana ay wiiqday nidaamka federaalka ee dalka.
“Dowlad sharci ah kama jirto Xamar, maamulladii kalena waa la juujuubay. Puntland ayaa ah meesha keliya ee ka nabad qabta dalka,” ayuu yiri Faroole.
Faroole ayaa sidoo kale ku baaqay in shacabka Puntland ay garab istaagaan maamulkooda, si loo ilaaliyo amniga iyo xasilloonida deegaanka. Wuxuu sheegay in nabadda Puntland ay muhiim u tahay shacabka, isla markaana loo baahan yahay in laga hortago wax kasta oo carqaladeyn kara.
“Waxaan u sheegaynaa shacabka reer Puntland in nabadda la ilaaliyo, cid kasta oo isku dayda inay qalalaase abuurtona laga feejignaado,” ayuu hadalkiisa ku daray.
Cabdiraxmaan Faroole ayaa hadalladan ka jeediyay kulan ay yeesheen waxgaradka gobolka Nugaal, kaas oo looga hadlay xaaladda siyaasadeed, arrimaha amniga iyo sidii loo xoojin lahaa wadajirka iyo xasilloonida Puntland.
Hadalkan ayaa kusoo beegmaya iyadoo uu weli taagan yahay khilaafka siyaasadeed ee u dhexeeya Dowladda Federaalka Soomaaliya iyo Puntland. Xiisadda ayaa sii xoogeysatay toddobaadyadii la soo dhaafay, iyadoo labada dhinac ay isku khilaafsan yihiin arrimo ay ka mid yihiin dastuurka, nidaamka federaalka iyo maamulka ciidamada.
