Wararka24: Madaxweynihii hore ee Soomaaliya, Maxamed Cabdillaahi Farmaajo ayaa warsaxaafadeed uu soo saaray ku sheegay in Soomaaliya ay gashay marxalad siyaasadeed iyo mid dastuuri ah oo halis ah, kadib sida uu sheegay dhammaadka muddo xileedka Madaxweynaha iyo Baarlamaanka Federaalka.
Qoraalka kasoo baxay Farmaajo ayaa lagu sheegay in xaaladda cusub ee dalka soo wajahday ay abuurtay firaaqo dastuuri ah iyo hubanti la’aan siyaasadeed, taas oo uu sheegay in looga gudbi karo oo keliya wada-tashi qaran oo loo dhan yahay.
Farmaajo ayaa ugu baaqay hormuudka siyaasadda, waxgaradka iyo qeybaha kala duwan ee bulshada Soomaaliyeed inay yeeshaan wadahadal iyo isu-tanaasul lagu badbaadinayo dowladnimada dalka iyo xasiloonida siyaasadeed.
Sidoo kale, madaxweynihii hore ayaa sheegay in xukuumadda hadda jirta ay noqotay mid xil-gaarsiin ah, isaga oo tixraacay qodobbo kamid ah dastuurka KMG ah ee dalka. Wuxuu tilmaamay in loo baahan yahay heshiis siyaasadeed oo horseeda doorasho la isku waafaqsan yahay si looga baxo marxaladda hadda jirta.
Dhanka kale, Farmaajo ayaa farriin gaar ah u diray ciidamada qalabka sida ee Soomaaliya, isaga oo ugu baaqay inay ka fogaadaan ku milanka arrimaha siyaasadda iyo in aan loo adeegsan awood ka baxsan sharciga.
Wuxuu sheegay in ciidamada looga baahan yahay inay xoogga saaraan waajibaadkooda dastuuriga ah ee la xiriira difaaca dalka, sugidda amniga iyo ilaalinta dowladnimada Soomaaliya.
Warsaxaafadeedkan ayaa kusoo aadaya xilli magaalada Muqdisho ay ka socdaan wada-hadallo u dhexeeya dowladda federaalka iyo siyaasiyiinta mucaaradka, kuwaas oo looga hadlayo arrimaha doorashooyinka, dastuurka iyo marxaladda kala guurka siyaasadeed ee dalka.
