Wararka24: Dowladda Federaalka Soomaaliya ayaa la sheegay inay waddo qorshe cusub oo lagu dhisayo 10 kun oo guri oo loogu talagalay dadka barakacayaasha ah, xilli dood xooggan ay ka taagan tahay dib u soo celinta dhulalka danta guud ee magaalada Muqdisho.
Wasiirkii hore ee Batroolka Soomaaliya, ahna xildhibaan ka tirsan Baarlamaanka Federaalka, Cabdirisaaq Maxamed Cumar, ayaa sheegay in dowladda ay billowday dib u habeyn iyo ka faa’iideysi dhulal muddo dheer ka maqnaa gacanta dowladda. Wuxuu tilmaamay in qaar ka mid ah dhulkaasi loo sharciyeeyay dad rayid ah si ay u isticmaalaan.
Sidoo kale, xildhibaanka ayaa sheegay in dhulal kale dib loogu celiyay wasaarado iyo hay’ado dowladeed oo horey u lahaa, si dib loogu soo nooleeyo adeegyada bulshada iyo howlaha maamulka. Wuxuu xusay in tallaabadaasi qeyb ka tahay qorshe ballaaran oo dib loogu nidaaminayo hantida qaranka.
Cabdirisaaq ayaa shaaca ka qaaday in dowladda ay hadda qorsheyneyso dhismaha kumannaan guri oo si gaar ah loogu talagalay qoysaska barakacayaasha ah, si xal loogu helo dhibaatooyinka hoy la’aanta. Sida uu sheegay, mashruucan ayaa muhiim u noqon kara qoysaska ku noolaa xeryaha barakaca.
Hadalkan ayaa kusoo aadaya xilli xiisad ka taagan tahay dhulalka danta guud ee Muqdisho, iyadoo dadka qaar laga raray goobo ay muddo deganaayeen. Dadkaasi ayaa cabasho ka muujiyay inaysan haysan deegaan kale oo ay u guuraan.
Xiisaddaasi ayaa mararka qaar isu beddeshay iska hor imaadyo hubeysan, waxaana dhacdooyinkii ugu dambeeyay laga soo sheegay degmada Dayniile, halkaas oo ciidamada dowladda iyo maleeshiyaad deegaanka ah ay isku dhaceen kadib muran la xiriira barakicin ah.
