Wararka24: Wasaaradda Gaashaandhigga Dowladda Federaalka Soomaaliya ayaa faahfaahin ka bixisay duqeyn culus oo aroornimadii maanta ka dhacday duleedka magaalada Baydhaba ee gobolka Baay.
Warsaxaafadeedka wasaaradda ayaa lagu sheegay in duqeynta ay si gaar ah uga dhacday deegaanka Gasarta oo u dhexeeya Baydhaba iyo Daynuunaay, halkaas oo lagu beegsaday maleeshiyaad ka tirsan Al Shabaab.
Qoraalka ayaa lagu xaqiijiyay in howlgalka lagu dilay 12 xubnood, isla markaana lagu dhaawacay tiro kale oo ka tirsan kooxda.
Wasaaradda ayaa sheegtay in duqeynta ay si wadajir ah u fuliyeen Ciidanka Xoogga Dalka iyo saaxiibo caalami ah, iyadoo lagu tilmaamay mid qeyb ka ah howlgallada lagu wiiqayo awoodda kooxaha hubeysan.
Sidoo kale, waxaa la xusay in howlgalladan ay yihiin kuwo joogto ah oo lagu xaqiijinayo amniga guud ee dalka laguna burburinayo xarumaha iyo abaabulka Al Shabaab.
Wasaaradda Gaashaandhigga ayaa caddeysay in ay sii socon doonaan weerarrada noocaan oo kale ah si loo ciribtiro khatarta argagixisada.
Duqeyntan ayaa kusoo aadeysa xilli ciidamada dowladda ay kordhiyeen howlgallada ka socda gobolka Baay, iyadoo maalmo kahor dagaallo ka dhaceen deegaanka Daynuunaay.
