Askari ka tirsan ciidamada dowladda ayaa ku geeriyooday qarax xooggan oo maanta ka dhacay bannaanka degmada Qoryooley ee gobolka Shabeellaha Hoose.
Qaraxa waxaa loo dhigay kolonyo askari ah oo ku socdaalayay bannaanka magaaladaasi. Kooxda Al-Shabaab ayaa sheegatay mas’uuliyadda weerarka.
Wararka kasoo baxaya deegaanka ayaa sheegaya in ugu yaraan laba askari ay ku geeriyoodeen halka saddex kale ay ku dhaawacmeen. Qaraxa ayaa haleelay mid kamid ah kolonyada gaadiidka dagaalka ee ay wateen ciidamada.
Dadka deegaanka ayaa xaqiijiyay in qaraxa uu dhacay, waxayna sheegeen in khasaare dhimasho iyo dhaawac leh uu soo gaaray ciidamada. Goobta ayaa hadda xaaladdeeda degan tahay.
Mas’uuliyiinta ammaanka iyo kuwa deegaanka ayaan weli ka hadlin weerarka. Ciidamada dowladda ayaa howlgallo kooban ka sameeyeen aagga degmada Qoryooley.
Maalmihii u dambeeyay waxaa gobolka Shabeellaha Hoose ka socday howlgallo ciidan oo looga hortagayo weerarada kooxda Al-Shabaab. Degmada Qoryooley ayaa 120 kilometer koonfur-galbeed kaga beegan magaalada Muqdisho.
Al-Shabaab ayaa weeraro ku dhufo oo ka dhaqaaq ah ku qaada xarumaha ciidamada dowladda iyo kuwa AMISOM ee ku yaalla koonfurta iyo bartamaha Soomaaliya.