Wararka24: Taliska Ciidanka Booliiska Dowlad Goboleedka Waqooyi Bari Soomaaliya ayaa sheegay inuu wado baaritaanno la xiriira shaqsiyaad iyo kooxo lagu eedeeyay inay ku lug leeyihiin duubista iyo faafinta muuqaallo uu talisku ku tilmaamay kuwo wax u dhimi kara amniga iyo xasilloonida deegaanka.
Qoraal kasoo baxay taliska ayaa lagu sheegay in hay’adaha ammaanku ay heleen xog muujinaysa in muuqaalladaasi loo adeegsanayo ujeeddooyin lagu marin habaabinayo bulshada. Booliiska ayaa sheegay inay si dhow ula socdaan cid kasta oo looga shakisan yahay inay door ku leedahay abaabulka, duubista ama baahinta waxyaabahaasi.
Taliska ayaa xusay in baaritaanno rasmi ah ay socdaan, isla markaana la ogaanayo dadka ku lugta leh arrintan. Waxaa sidoo kale lagu sheegay in qof kasta oo lagu helo inuu qayb ka yahay falalkaasi loo gudbin doono hay’adaha garsoorka si sharciga loo marsiiyo.
Booliiska Waqooyi Bari ayaa shacabka ugu baaqay inay la shaqeeyaan laamaha ammaanka, ayna ka fogaadaan faafinta wax kasta oo ay mas’uuliyiintu ku tilmaameen kuwo dhaawici kara nabadda iyo amniga bulshada. Taliska ayaa ku adkeystay muhiimadda ay leedahay wada shaqeynta shacabka iyo hay’adaha amniga.
Bayaanka ayaa kusoo aadaya xilli ay jireen doodo iyo falcelino bulsho oo ka dhashay muuqaallo lagu baahiyay baraha bulshada maalmihii la soo dhaafay. Arrimahaasi ayaa si weyn looga hadal hayay deegaannada maamulka Waqooyi Bari.
Dhanka kale, mas’uuliyiinta ammaanka ayaa sheegay inay sii wadi doonaan dadaallada lagu ilaalinayo xasilloonida iyo kala dambeynta, iyagoo xusay in tallaabo sharci laga qaadi doono cid kasta oo lagu helo falal lid ku ah shuruucda iyo amniga deegaanka.
Taliska ayaa ugu dambeyn ku boorriyay shacabka inay xog kasta oo la xiriirta arrimaha amniga la wadaagaan laamaha ammaanka si loo xoojiyo nabadda iyo wadajirka bulshada.
