Wararka24: Safiirkii Itoobiya ee Soomaaliya, Suleymaan Dedefo Woshe, oo dhawaan soo gaba-gabeeyay howlihii diblomaasiyadeed ee uu ka hayay Muqdisho, ayaa farriin ku saabsan xaaladda dalka u diray shacabka iyo hoggaamiyeyaasha Soomaaliyeed.
Dedefo ayaa sheegay inuu ka xun yahay dhibaatooyinka amni-darro ee ay weli wajahaan shacabka Soomaaliyeed, isagoo xusay in nabadgelyadu tahay xuquuq ay mudan yihiin dhammaan dadka dalka. Wuxuu sheegay in shacabka Soomaaliyeed ay xaq u leeyihiin inay ku noolaadaan deegaan ammaan ah oo xasilloon.
“Waxa aan ka xumahay dhibaatooyinka ay shacabka Soomaaliyeed weli la kulmaan ee amni-darro. Shacabka Soomaaliyeed waxay mudan yihiin nabad,” ayuu yiri Dedefo.
Safiirka ayaa sidoo kale sheegay in shacabka Soomaaliya ay mudan yihiin amni, xorriyad, sharaf iyo fursado ay ku horumariyaan noloshooda. Wuxuu carrabka ku adkeeyay muhiimadda ay leedahay in dalka laga abuuro xaalad u saamaxaysa dadka inay si nabad ah ugu noolaadaan una shaqeystaan.
“Waxay mudan yihiin amni. Waxay mudan yihiin xorriyad, sharaf, fursad iyo barwaaqo,” ayuu hadalkiisa ku daray. Dedefo ayaa sheegay inuu rajeynayo in carruurta Soomaaliyeed ay ku koraan waddan ammaan ah oo nabdoon, ayna mustaqbalkooda ku wajahaan rajo iyo fursado wanaagsan. Wuxuu sheegay in carruurta aanay mudnayn inay ku barbaaraan cabsi iyo xaalado amni-darro.
Safiirkii hore ee Itoobiya ayaa sidoo kale farriin gaar ah u diray hoggaamiyeyaasha Soomaaliyeed, isagoo ugu baaqay inay dhinac iska dhigaan khilaafaadka siyaasadeed, isla markaana danta qaranka ka hormariyaan arrimaha kale.
“Waxaan si daacad ah u rajeynayaa in hoggaamiyeyaasha Soomaaliyeed ay meel iska dhigaan khilaafka oo danta qaranka ka hor mariyaan wax kasta,” ayuu yiri Dedefo.
Wuxuu sheegay in hoggaamiyeyaasha ay saaran tahay mas’uuliyad weyn, isla markaana ay haystaan fursad ay ku dhisi karaan Soomaaliya nabad ah, midaysan, deggan oo barwaaqo ah. Hadalka safiirka ayaa yimid xilli Soomaaliya ay weli wajahdo caqabado dhinaca amniga iyo khilaafaadka siyaasadeed ah.
Suleymaan Dedefo Woshe ayaa dhawaan Muqdisho ka tegay kadib markii uu soo gaba-gabeeyay muddadii uu safiirka Itoobiya u fadhiyay Soomaaliya, iyadoo labada dal ay leeyihiin xiriir diblomaasiyadeed iyo mid siyaasadeed oo muddo dheer soo jiray.
