Wararka24: Soomaaliya ayaa markii ugu horreysay ka qayb gashay shir sanadeedka Dalladda Hay’adaha Xuquuqda Aadanaha ee dalalka IGAD oo lagu qabtay magaalada Bishoftu ee dalka Itoobiya.
Wefdiga Soomaaliya ayaa waxaa hoggaaminayay Guddoomiye ku xigeenka Guddiga Madaxa bannaan ee Xuquuqul Insaanka Qaranka Maxamed Haaruun Maxamuud.
Shirka ayaa diiradda lagu saaray xoojinta waxqabadka dalladda, iyadoo Kenya loo doortay hoggaanka sannadka soo socda, kadib markii ay kala wareegtay Itoobiya, isla markaana la ansixiyay qorshe hawleed cusub.
Soomaaliya ayaa sidoo kale soo bandhigtay warbixin ku saabsan xaaladda xuquuqda aadanaha iyo horumarka laga sameeyay dhismaha guddiga cusub ee dalka.
Masuuliyiinta Soomaaliya ayaa xusay in qaraar ay Qaramada Midoobay soo saartay bishii Oktoobar 2025 uu door muhiim ah ka siinayo hay’adaha qaranka la socodka xuquuqda aadanaha.Dhanka kale, masuuliyiinta Soomaaliya ayaa kulamo la yeeshay wakiillo ka socday Itoobiya iyo Kenya, iyagoo ka wadahadlay xoojinta iskaashiga gobolka.
Waxaa sidoo kale la sheegay in la dedejinayo qorshaha Soomaaliya uga mid noqonayso shabakadda hay’adaha xuquuqda aadanaha ee Afrika.
