Wararka24: Wasaaradda Deegaanka iyo Isbeddelka Cimilada ee Jubaland ayaa digniin ka soo saartay roobab culus iyo fatahaado laga cabsi qabo inay saameeyaan deegaanada maamulka laga bilaabo bisha Oktoobar 2026.
Wasiirka Wasaaradda, Caydiid Suleymaan Xaashi, ayaa sheegay in saadaasha cimiladu muujinayso khatar sii kordheysa oo la xiriirta roobabka Deyrta, gaar ahaan kuwa la filayo horraanta bisha Oktoobar.
Wasiirku wuxuu sheegay in ilaa 12 degmo oo Jubaland ah ay u nuglaan karaan fatahaadaha iyo roobabka xooggan. Wuxuu dadka ku nool hareeraha webiyada, meelaha biyo-mareennada iyo dhulka hoose ugu baaqay inay ka fogaadaan goobaha halista ah, ayna u guuraan meelaha ammaan ah haddii xaaladdu kasii darto.
Saadaasha cimilada ayaa sidoo kale muujinaysa in Soomaaliya ay wajihi karto roobab ka sarreeya celceliska xilliga Oktoobar ilaa Diseembar, iyadoo khatarta fatahaaduhu si gaar ah uga jirto hareeraha webiyada Jubba iyo Shabeelle.
Caydiid Suleymaan ayaa sheegay in qiyaastii 1.8 milyan oo qof ay saameyn ka qaadi karaan roobabka iyo fatahaadaha la saadaalinayo, halka in ka badan 351,000 qof ay suuragal tahay inay ka barakacaan deegaanadooda haddii fatahaado waaweyn dhacaan.
Waxa uu intaas ku daray in ku dhowaad 45 xarumood oo caafimaad iyo 10 iskuul ay wajihi karaan khatar, haddii fatahaadaha la saadaaliyay ay dhacaan. Digniintan ayaa kusoo beegmaysa xilli Soomaaliya ay weli xusuusan tahay fatahaadihii waaweynaa ee 2023 oo sababay barakac iyo khasaare ballaaran.
Wasiirka ayaa shacabka Jubaland, gudaha dalka iyo qurba-joogta ugu baaqay inay si hore ah ugu diyaar garoobaan xaaladda, isagoo xusay muhiimadda ay leedahay isku-tashi iyo qorshe degdeg ah oo looga jawaabo musiibooyinka dabiiciga ah.
Sidoo kale, wuxuu dowladda federaalka ku dhaliilay taageeradii ay Jubaland ka heli weyday xilligii abaarta, isagoo beesha caalamka ugu baaqay in gargaarka loogu talagalay Jubaland si toos ah loo gaarsiiyo maamulka.
Wasaaradda ayaa hay’adaha dowladda ugu baaqday inay diyaariyaan qorshayaal gaar ah oo looga hortagayo saameynta fatahaadaha, gaar ahaan dhinacyada caafimaadka, beeraha, xoolaha iyo ilaalinta bulshada.
