Wararka24: Ciidamada Milateriga Somaliland ayaa hawlgallo ka fuliyay gobollada Awdal iyo Salal, halkaas oo ay gacanta ku dhigeen hub iyo gaadiid dagaal oo ay haysteen dhinacyadii ku lug lahaa colaadaha beeleed ee dhowaan ka dhacay deegaannadaasi.
Ciidamada ayaa soo bandhigay qaar ka mid ah gaadiidka dagaalka ee ay hawlgallada ku soo qabteen, iyagoo sheegay in aan shacabka loo oggolaan doonin inay si sharci-darro ah u haystaan hub ama gaadiid dagaal.
Taliska ciidamada Somaliland ayaa sheegay in amar lagu siiyay inay tallaabo adag ka qaadaan cid kasta oo hub la soo baxda ama isku dayda inay dib u huriso colaadda ka taagan galbeedka Somaliland.
Hawlgalladan ayaa kusoo beegmaya kaddib markii dhinacyadii ku dagaallamay Awdal iyo Salal ay jebiyeen heshiis nabadeed oo ay horey u gaareen, kaas oo dhigayay in la ilaaliyo xabbad-joojinta lagana fogaado tallaabo kasta oo sababi karta in dagaalku dib u billowdo.
Sida heshiiska lagu qeexay, ciidamada ayaa loo xilsaaray inay qaadaan tallaabooyin lagu xaqiijinayo nabadda, isla markaana ay awood u adeegsadaan cid kasta oo lagu qabto hub ama lagu eedeeyo inay dib u hurinayso colaadda.
Colaadda ka taagan deegaannada galbeedka Somaliland ayaa soo bilaabatay bishii November 2025, kaddib khilaaf ka dhashay bandhig la qorsheeyay in magaalada Saylac loogu qabto buugga Xeer Ciise, kaas oo ay diideen qaar ka mid ah beelaha magaalada wada dega.
Tan iyo markii khilaafku isu beddelay iska horimaadyo hubaysan, waxaa dhowr jeer la isku dayay in dhinacyada lagu heshiisiiyo, waxaana la gaaray heshiisyo nabadeed oo lagu doonayay in lagu soo afjaro colaadda.
Si kastaba, xabbad-joojinta ayaa marar badan burburtay, iyadoo ay dib u soo noqdeen iska horimaadyada. Hawlgallada cusub ee ciidamada Somaliland ayaa qayb ka ah dadaallada lagu doonayo in hubka looga dhigo dhinacyada isku haya colaadda iyo in la dhaqan-geliyo heshiisyada nabadeed.
Xukuumadda Somaliland ayaa horey u sheegtay in aan loo dulqaadan doonin cid kasta oo isku dayda inay dib u bilowdo dagaal beeleed ama si sharci-darro ah u haysata hub iyo gaadiid dagaal.
