Wararka24: Ra’iisul Wasaaraha Soomaaliya, Xamse Cabdi Barre, ayaa sheegay in xukuumaddu bilowday dib-u-habeyn lagu nidaaminayo waxbarashada Islaamiga ah, isagoo xusay in markii ugu horreysay dugsiyada Qur’aanka lagu darayo nidaamka rasmiga ah ee waxbarashada dalka.
Ra’iisul Wasaaruhu ayaa sheegay in dugsiyada Qur’aanka loo aqoonsan doono qeyb rasmi ah oo ka tirsan nidaamka waxbarashada dowladda, isla markaana loo sameyn doono manhaj mideysan, shahaadooyin iyo kormeer ay maamuli doonto Wasaaradda Waxbarashada.
Xamse Cabdi Barre ayaa sheegay in mustaqbalka aan loo oggolaan doonin qof aan haysan tababar iyo shahaado la aqoonsan yahay inuu macallin ka noqdo dugsi Qur’aan. Wuxuu xusay in macallimiinta la siin doono tababaro, isla markaana dugsiyada Qur’aanka lagu dari doono qorshaha horumarinta waxbarashada ee dowladda.
Ra’iisul Wasaaruhu wuxuu sidoo kale sheegay in xukuumaddu waddo qorshe lagu dhisayo Golaha Sare ee Culumada Soomaaliyeed, kaas oo uu sheegay inuu soo saari doono fatwooyin mideysan oo rasmi ah, si loo mideeyo aragtida diimeed ee laga gudbinayo masaajidda iyo goobaha kale ee diinta.
Xamse Cabdi Barre ayaa sheegay in tallaabooyinkan ay qeyb ka yihiin siyaasadda dowladda ee lagu nidaaminayo waxbarashada Islaamiga ah iyo xoojinta doorka ay diintu ku leedahay bulshada Soomaaliyeed. Ma uusan sheegin waqtiga rasmiga ah ee isbeddelladan si buuxda loo hirgelin doono.
