Wararka24: Ciidamada Mareykanka ayaa sheegay in askari kale oo Mareykan ah lagu dilay waqooyiga Ciraaq, maalin kadib markii weerar lagu qaaday saldhig ay ciidamada Mareykanku ku leeyihiin Jordan uu sababay dhimashada laba askari iyo in mid kale la la’yahay.
Taliska Dhexe ee Ciidamada Mareykanka (CENTCOM) ayaa sheegay in askariga uu dhintay xilli ciidamada ay si qorsheysan u burburinayeen walxaha qarxa ee saarnaa diyaarad aan duuliye lahayn oo ay sheegeen inay Iran leedahay, taas oo hore loo soo riday. Qaraxa ayaa sidoo kale dhaawacay askari kale.
Sida CENTCOM sheegtay, tirada ciidamada Mareykanka ee ku dhintay colaaddan ayaa gaartay 17, kadib markii sidoo kale la xaqiijiyay geerida duuliye ka tirsanaa ciidamada badda Mareykanka oo horay loo waayay.
Wararka ayaa kusoo beegmaya iyadoo Mareykanka iyo Iran ay maalintii siddeedaad oo xiriir ah isweydaarsanayaan weerarro ka dhacay Ciraaq, Jordan, dalalka Khaliijka iyo agagaarka Marinka Hormuz.
CENTCOM ayaa sidoo kale sheegtay in goobtii lagu weeraray saldhigga Jordan laga helay haraaga qof aan weli la aqoonsan, iyadoo baaritaanno lagu xaqiijinayo aqoonsigiisa ay socdaan.
Dowladda Mareykanka ayaa weerarrada ku eedeysay Iran, waxayna sheegtay in duqeymaha ay xigtay ay qeyb ka yihiin jawaab militari oo looga falcelinayo weerarrada lagu qaaday ciidamadeeda. Dhanka kale, Iran ayaa ku eedeysay Mareykanka inuu beegsanayo kaabayaal muhiim ah iyo goobo rayid ah.
Xiisaddan ayaa sii kordhisay walaaca laga qabo in colaaddu isu beddesho dagaal ballaaran oo saameeya dalal badan oo Bariga Dhexe ah. Qaramada Midoobay ayaa ugu baaqday dhammaan dhinacyada inay muujiyaan is-xakameyn si looga hortago sii ballaarashada dagaalka.
