Wararka24: Taliyaha Ciidanka Dhulka ee Jamhuuriyadda Turkiga, Jeneraal Metin Tokel, ayaa maanta booqasho rasmi ah ku yimid magaalada Muqdisho, halkaas oo si diirran loogu soo dhaweeyay Garoonka Diyaaradaha Aadan Cadde.
Taliyaha Ciidanka Dhulka ee Xoogga Dalka Soomaaliyeed, Sarreeye Guuto Sahal Cabdullaahi Cumar, ayaa hoggaamiyay munaasabadda soo dhaweynta, iyadoo wafdiga Turkiga loo sameeyay hab-maamuus ciidan oo muujinaya xiriirka dhow ee dhinacyada difaaca ee labada dal.
Booqashadan ayaa qeyb ka ah dadaallada lagu sii xoojinayo iskaashiga istaraatiijiga ah ee Soomaaliya iyo Turkiga, gaar ahaan dhinacyada amniga, difaaca iyo tayeynta ciidamada.
Turkiga ayaa sannadihii la soo dhaafay door muuqda ka qaatay dib-u-dhiska Ciidanka Xoogga Dalka Soomaaliyeed, isagoo bixiyay tababaro, taageero farsamo iyo qalab lagu horumarinayo awoodda ciidamada.
Mas’uuliyiinta labada dal ayaa la filayaa inay yeeshaan kulamo looga hadlayo ballaarinta iskaashiga difaaca, kordhinta tababarrada ciidamada, is-weydaarsiga khibradaha milatari iyo xoojinta wada-shaqeynta amniga ee labada dhinac.
Soomaaliya iyo Turkiga ayaa muddo dheer lahaa xiriir dhow oo ku dhisan iskaashi dhinacyo badan leh, iyadoo Ankara ay ka mid tahay saaxiibada ugu waaweyn ee taageera dib-u-dhiska hay’adaha dowladda iyo ciidamada Soomaaliya.
Booqashada Jeneraal Metin Tokel ayaa sidoo kale la filayaa inay sii xoojiso wada-shaqeynta ka dhaxeysa ciidamada labada dal, isla markaana ay gacan ka geysato kor u qaadista awoodda difaaca Soomaaliya iyo la dagaallanka khataraha amni ee dalka iyo gobolka.
