Wararka24: Ra’iisul Wasaaraha Israa’iil, Benjamin Netanyahu, ayaa ugu baaqay dowladda Mareykanka inaysan Turkiga ka iibin diyaaradaha dagaalka ee F-35 ama matoorrada loo adeegsado diyaaradahaas, isagoo sheegay in tallaabadaasi ay saameyn ku yeelan karto isu-dheellitirka awoodda militari ee Bariga Dhexe.
Wareysi uu siiyay barnaamijka Fox & Friends ee telefishinka Fox News, ayuu Netanyahu ku sheegay in Israa’iil ay walaac ka qabto suurtagalnimada in Turkigu dib ugu soo laabto barnaamijka F-35, kaas oo Ankara laga saaray sanadkii 2019.
Netanyahu ayaa sheegay in siinta Turkiga diyaaradaha F-35 ama tiknoolajiyada la xiriirta ay wax u dhimi karto awoodda militari ee Israa’iil iyo dheelitirka amniga gobolka. Wuxuu carrabka ku adkeeyay in Mareykanku uu tixgeliyo saameynta ay arrintaasi ku yeelan karto xulafadiisa Bariga Dhexe.
Hadalka Netanyahu ayaa kusoo beegmaya xilli ay soo baxayaan warar sheegaya in Turkigu uu dib u billaabay dadaallo uu ku doonayo inuu dib ugu soo laabto barnaamijka F-35, kadib markii xiriirka difaaca ee Ankara iyo Washington uu soo hagaagay bilihii la soo dhaafay.
Turkiga ayaa hore uga mid ahaa dalalkii iskaashiga ku lahaa soo saarista diyaaradaha F-35, wuxuuna qorsheynayay inuu iibsado in ka badan 100 diyaaradood. Hase yeeshee, Mareykanka ayaa ka saaray barnaamijka kadib markii Ankara ay Ruushka ka iibsatay nidaamka difaaca hawada ee S-400, iyadoo Washington ay ku doodday in nidaamkaasi uu halis gelin karo sirta farsamo ee F-35.
Tan iyo xilligaas, Turkigu wuxuu si joogto ah u dalbanayay in dib loogu soo celiyo barnaamijka ama loo magdhabo lacagihii uu hore u bixiyay. Dowladda Turkiga ayaa sidoo kale horumarinaysa diyaaraddeeda dagaalka ee gudaha laga sameynayo ee KAAN, si ay u yareyso ku tiirsanaanta hubka reer Galbeedka.
Dhanka kale, Israa’iil ayaa weli ah dalka keliya ee Bariga Dhexe haysta diyaaradaha F-35, iyadoo muddo dheer ku adkeysaneysay in la ilaaliyo siyaasadda loo yaqaan “Qualitative Military Edge (QME)”, taas oo dammaanad qaadaysa inay sii haysato awood militari oo ka sarreysa tan dalalka kale ee gobolka.
Ilaa hadda, dowladda Mareykanka kama aysan jawaabin baaqa Netanyahu, mana jiro go’aan rasmi ah oo lagu shaaciyay oo ku saabsan in Turkiga dib loogu oggolaanayo barnaamijka diyaaradaha F-35.
