Wararka24: Dowladda Federaalka Soomaaliya ayaa shaacisay in la joojiyay isticmaalka magaca “madaxweyne” ee hore loogu adeegsan jiray madaxda dowlad-goboleedyada dalka, iyadoo hadda kadib loogu yeeri doono “hoggaamiyeyaal”.
Wasiirka Arrimaha Gudaha, Federaalka iyo Dib-u-heshiisiinta Soomaaliya, Cali Yuusuf Cali (Xoosh), ayaa sheegay in isbeddelkan uu salka ku hayo qodobbo ku jira dastuurka cusub ee dhowaan la ansixiyay. Sida uu sheegay, magaca cusub ayaa si rasmi ah loogu adeegsan doonaa dhammaan madaxda dowlad-goboleedyada.
Wasiirka ayaa xusay in nidaamkan cusub uu quseeyo dhammaan dowlad-goboleedyada, oo ay ku jiraan kuwa aan weli taageersaneyn dastuurka cusub. Wuxuu tilmaamay in ereyga “hoggaamiye” uu noqon doono magaca rasmiga ah ee lagu aqoonsanayo madaxda maamullada dalka.
Dastuurka cusub ee uu hore u saxiixay Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa dhigaya in madaxda dowlad-goboleedyada aan loo adeegsan karin magaca “madaxweyne”, balse loo aqoonsan doono “hoggaamiyeyaal”.
Muddo dheer ayay madaxda dowlad-goboleedyadu u adeegsanayeen magaca madaxweyne, hase yeeshee isbeddelka dastuuriga ah ee cusub ayaa wax ka beddelay habka loo magacaabayo, iyadoo laga bilaabo dhaqan-galka qodobkan ay meesha ka baxayso adeegsiga magacaasi.
Dastuurkan cusub ayaa weli wajahaya dood iyo mucaaradad siyaasadeed, waxaana ka horyimid qaar ka mid ah siyaasiyiinta mucaaradka iyo madax hore oo dalka soo hoggaamiyay. Sidoo kale, maamullada Puntland iyo Jubbaland ayaa hore u sheegay in aysan aqoonsanayn wax ka beddel kasta oo lagu sameeyo dastuurkii lagu heshiiyay sanadkii 2012.
Doodda la xiriirta dastuurka iyo qaabka maamulka federaalka ayaa weli ka mid ah arrimaha ugu waaweyn ee saameynta ku leh siyaasadda Soomaaliya, iyadoo la filayo in arrintan ay sii dhaliso falcelinno siyaasadeed oo kala duwan.
