Wararka24: Afartan iyo saddex muwaadiniin Soomaaliyeed oo lagu eedeeyay falal la xiriira burcad-badeednimo ayaa qirtay dambiyada lagu soo oogay, xilli ay ka hor muuqdeen maxkamad ku taalla magaalada Mumbai ee dalka Hindiya.
Eedeysanayaashan ayaa ka mid ahaa 44 qof oo Ciidanka Badda Hindiya ay qabteen bishii Maarso 2024, kaddib hawlgallo lagu soo furtay maraakiibta MV Ruen iyo Al-Kambar 786, kuwaas oo la sheegay in la afduubay, halka shaqaalihii saarnaana lagu haystay madax-furasho.
Mas’uuliyiinta Hindiya ayaa sheegay in ciidamada badda ay soo badbaadiyeen shaqaalihii maraakiibta, kadibna eedeysanayaasha loo gudbiyay booliiska magaalada Mumbai si dacwad loogu soo oogo.
Dowladda Hindiya ayaa ku soo oogtay dacwado ay ka mid yihiin afduub lagu dalbanayay madax-furasho, ku xadgudubka sharciga la-dagaallanka burcad-badeedda, jebinta sharciga hubka, xeerarka baasaboorrada iyo sharciga ajaanibta.
Qoraal loo gudbiyay maxkamadda, 43-ka eedeysane ayaa sheegay inay muddo ku dhow laba sano ku jireen xabsi ku-meel-gaar ah, isla markaana ay la kulmeen caqabado ay ka mid yihiin kala duwanaanshaha luqadda, dhaqanka, cuntada iyo hab-nololeedka.
Waxay sidoo kale sheegeen inaysan haysan qaraabo ama saaxiibo u dhow oo taageero siiya, ayna si iskood ah u qirteen eedaha loo haysto, iyagoo caddeeyay inaan lagu qasbin qirashadooda.
Eedeysanayaashu waxay maxkamadda ka codsadeen in loo tixgeliyo duruufahooda gaarka ah, iyagoo sheegay inay yihiin dad danyar ah, isla markaana tani ay tahay markii ugu horreysay ee lagu soo eedeeyo falal noocan oo kale ah.
Maxkamadda ayaa dib u dhigtay go’aanka kama dambaysta ah ee kiiska, si eedeysanayaasha loo siiyo waqti dheeraad ah oo ay dib ugu eegaan qirashadooda kahor inta aan si rasmi ah loo aqbalin ama xukun lagu ridin.
