Wararka24: Dowladda Federaalka Soomaaliya ayaa si kulul u cambaareysay qarax ka dhacay magaalada Dimishiq ee caasimadda Suuriya, kaas oo lagu beegsaday maqaaxi ay ku sugnaayeen dad rayid ah, iyadoo muujisay garab istaag ay u fidisay dowladda iyo shacabka Suuriya.
Sida ay baahisay Wakaaladda Wararka Dowladda Suuriya ee SNA, qaraxa ayaa ka dhashay walax qaraxda oo lagu dhex aasay maqaayadda, waxaana ku dhintay ugu yaraan afar qof halka 11 kale ay ku dhaawacmeen.
Bayaan ay soo saartay Wasaaradda Arrimaha Dibadda iyo Iskaashiga Caalamiga ah ee Soomaaliya ayaa lagu sheegay in dowladda Soomaaliya ay si weyn uga xun tahay weerarkaasi, kaas oo sababay dhimashada iyo dhaawaca dad rayid ah oo aan wax lug ah ku lahayn falalka rabshadaha.
Dowladda Soomaaliya ayaa tacsi u dirtay dowladda Suuriya iyo qoysaska ay saameeyeen dhacdada, iyadoo sidoo kale u rajeysay dadka dhaawacmay caafimaad degdeg ah iyo soo kabasho buuxda.
Wasaaradda Arrimaha Dibadda ayaa sheegtay in Soomaaliya ay si adag u diidan tahay dhammaan falalka argagixisada iyo weerarrada lagu beegsado shacabka, iyada oo ku baaqday in la xoojiyo dadaallada lagu ilaalinayo nabadda iyo xasilloonida.
Bayaanka ayaa sidoo kale lagu caddeeyay in Soomaaliya ay garab taagan tahay dowladda Suuriya xilligan adag, isla markaana ay taageersan tahay dadaallada lagu xaqiijinayo amniga, xasilloonida iyo badbaadada shacabka dalkaasi.
Illaa hadda ma jirto cid si rasmi ah u sheegatay mas’uuliyadda qaraxa ka dhacay Dimishiq, iyadoo laamaha ammaanka Suuriya ay wadaan baaritaanno lagu ogaanayo cidda ka dambeysay weerarka.
Suuriya ayaa muddooyinkii dambe wajahaysay xaalad amni oo ka duwan sanadihii hore, waxaana dhacdadan ay kusoo aadaysaa xilli ay socdaan dadaallo lagu xoojinayo amniga iyo dib-u-soo kabashada dalka.
