Wararka24: Taliska Ciidanka Booliska Soomaaliyeed ayaa maanta gubay dawooyin maandooriye ahaan loo adeegsado oo hore loogu qabtay dekedda Muqdisho, kadib amar ka soo baxay maxkamad awood u leh oo faraysay in si fagaare ah loo burburiyo.
Dawooyinkan ayaa lagu gubay goob ay goobjoog ka ahaayeen saraakiil ka tirsan ciidamada ammaanka iyo mas’uuliyiin kale, iyadoo tallaabadan lagu tilmaamay mid looga hortagayo khatarta ay ku hayeen bulshada.
Afhayeenka Ciidanka Booliska Soomaaliyeed ayaa sheegay in qiimaha dawooyinka la burburiyay uu gaarayo ku dhowaad 20 kun oo doollar, isagoo xusay in dawooyinkan si khaldan looga faa’iidaysan jiray, kana baxsaneyd ujeeddooyinkooda caafimaad.
Wuxuu tilmaamay in isticmaalka dawooyinkan uu sababi karo dhibaatooyin caafimaad iyo kuwo nafsiyeed, isla markaana uu saameyn ku yeelan karo amniga iyo badqabka bulshada.
Dawooyinka la gubay waxaa ka mid ahaa kaniiniyada Pregabalin oo sidoo kale loo yaqaan “bilibili” iyo Tramadol, kuwaas oo loo isticmaalo daaweynta xanuunno gaar ah, balse mararka qaar si qaldan loogu adeegsado ujeeddooyin maandooriye.
Hay’adaha ammaanka Soomaaliya ayaa muddooyinkii dambe kordhiyay howl-gallada lagu qabto dawooyinka iyo walxaha maandooriyaha loo adeegsado, kuwaas oo inta badan dalka ka soo gala dekedaha iyo marinno kale oo ganacsi.
Dowladda Federaalka Soomaaliya ayaa sheegtay inay sii wadi doonto dadaallada lagu xakameynayo maandooriyaha iyo waxyaabaha khatarta ku ah caafimaadka bulshada, iyadoo lagu baaqay in la xoojiyo wada-shaqeynta u dhexeysa hay’adaha dowladda iyo shacabka si looga hortago faafitaanka dawooyinka si khaldan loo isticmaalo.
