Dowladda Kenya ayaa markii ugu horreysay si rasmi ah uga hadashay masaafurinta Ra’iisul Wasaare Ku-xigeenka Soomaaliya, Jibriil Cabdirashiid, iyadoo sheegtay inuu watay dukumentiyo Kenyan ah oo lagu tuhunsan yahay inuu si sharci darro ah ku helay.
Bayaan ay soo saareen hay’adaha ammaanka Kenya ayaa lagu sheegay in Jibriil Cabdirashiid lagu tuhunsan yahay inuu ku lug lahaa dhaqdhaqaaqyo ay Kenya ku tilmaantay kuwo khatar ku ah amniga deegaannada ku dhow xadka ay wadaagaan Soomaaliya iyo Kenya.
Mas’uuliyiinta Kenya ayaa sidoo kale ku eedeeyay inuu ku lug lahaa daabulista hub loo waday mid kamid ah magaalooyinka xadka, iyadoo la sheegay in hubkaasi loogu talagalay taageeridda maleeshiyaad beeleed. Dowladda Kenya ayaa arrintaasi ku tilmaantay mid halis gelin karta amniga iyo xasilloonida deegaanka.
Bayaanka ayaa sidoo kale lagu sheegay in mas’uulkan lala xiriirinayo iska horimaadyo hubeysan oo dhawaan ka dhacay magaalada Baydhabo, kuwaas oo la sheegay inay sababeen dhimasho iyo barakac soo gaaray dad rayid ah.
Dowladda Kenya waxay sheegtay in dadaallo ay sameeyeen siyaasiyiin Kenyan ah oo lagu doonayay in lagu hakiyo masaafurinta aysan guuleysan, taasoo keentay in ugu dambeyn dib loogu celiyo Soomaaliya.
Ilaa hadda Dowladda Federaalka Soomaaliya iyo Ra’iisul Wasaare Ku-xigeenka Soomaaliya kama aysan soo saarin wax war rasmi ah oo ay kaga jawaabayaan eedeymaha ay dowladda Kenya soo bandhigtay.
Dhacdadan ayaa imanaysa xilli xiriirka diblomaasiyadeed ee u dhexeeya Soomaaliya iyo Kenya uu muhiim u yahay arrimaha amniga, ganacsiga iyo iskaashiga gobolka.
