Wararka24: Dowladda Federaalka Soomaaliya ayaa maanta wafdi heer wasiir ah u dirtay magaalada Beledweyne ee xarunta gobolka Hiiraan, si ay uga qaybgalaan munaasabad lagu xusay 49 guurada ka soo wareegtay xornimada Jamhuuriyadda Jabuuti.
Wafdiga ayaa waxaa hoggaaminayay Wasiirka Gaashaandhigga Soomaaliya Axmed Macallin Fiqi, waxaana qayb ka ahaa Wasiirka Warfaafinta, Dhaqanka iyo Dalxiiska Cabdifitaax Qaasim Maxamuud, Wasiiru-dowlaha Amniga Gudaha Maxamed Cali Xagaa, Safiirka Jabuuti ee Soomaaliya Cismaan Dubad, xildhibaanno iyo masuuliyiin kale.
Munaasabadda ayaa lagu qabtay xarunta ciidamada Jabuuti ee ka tirsan Howlgalka Taageerada iyo Xasilinta Midowga Afrika ee Soomaaliya (AUSSOM) ee magaalada Beledweyne, halkaas oo lagu maamuusay sannad-guurada 49-aad ee xornimada Jabuuti.
Ka qaybgalayaasha munaasabadda ayaa xusay xiriirka taariikhiga ah ee u dhexeeya Soomaaliya iyo Jabuuti, iyagoo sidoo kale bogaadiyay kaalintii Soomaaliya ay ka qaadatay halgankii xornimo-doonka Jabuuti ee lagaga soo horjeeday gumeysigii Faransiiska.
Dhanka kale, Madaxweynaha Soomaaliya Xasan Sheekh Maxamuud ayaa ku sugan dalka Jabuuti, halkaas oo uu kaga qaybgalayo munaasabadaha lagu xusayo 49 sano guurada ka soo wareegtay xornimada dalkaasi oo ku beegan 27-ka Juun 1977.
Jabuuti ayaa ka mid ah dalalka sida joogtada ah u taageera Soomaaliya, gaar ahaan dhinacyada dowlad-dhiska, amniga iyo iskaashiga gobolka.
Xilligan waxaa Soomaaliya ka socda munaasabado lagu xusayo maalmaha xorriyadda, iyadoo dhawaan la dabaal-degay 26-ka Juun, halka shacabka Soomaaliyeed ay isku diyaarinayaan xuska 1-da Luulyo oo astaan u ah midowgii gobollada Waqooyi iyo Koonfur.
