Wararka24: Garsooraha caalamiga ah ee Soomaaliyeed, Cumar Cartan, ayaa gaaray dalka Kuwait, halkaas oo uu dhexdhexaadin doono kulan muhiim ah oo ka tirsan horyaalka Zain Premier League.
Cartan ayaa loo magacaabay inuu maamulo ciyaarta u dhexeysa kooxaha Kuwait SC iyo Al-Qadsiya, taas oo la ciyaari doono 29-ka Juun 2026, Ciyaartan ayaa sidoo kale noqon doonta mid kooxda Kuwait SC loogu caleema saarayo koobka horyaalka dalkaas
Garsooraha Soomaaliyeed ayaa dalka Kuwait ku tagay martiqaad rasmi ah oo uu ka helay Guddoomiyaha Xiriirka Kubadda Cagta Kuwait, Sheekh Axmed Al-Yuusuf, taas oo muujinaysa kalsoonida lagu qabo heerkiisa garsoornimo.
Markii uu gaaray Kuwait waxaa si rasmi ah u soo dhoweeyey Safiirka Soomaaliya ee dalkaasi, Cabdullaahi Maxamed Sheekh, mas’uuliyiin ka tirsan Xiriirka Kubadda Cagta Kuwait iyo wakiillo ka socday shirkadda Al Shaayic.
Cumar Cartan ayaa sanadihii dambe si weyn uga dhex muuqday garoomada caalamiga ah, isagoo loo aqoonsaday mid ka mid ah garsoorayaasha ugu wanaagsan qaaradda Afrika.
Horaantii sanadkan ayaa sidoo kale la shaaciyey in Cartan uu ka mid noqon doono garsoorayaasha loo xulay ciyaaro waaweyn oo heer caalami ah, waxaana magaciisa lagu xusay tartamada ugu muhiimsan ee kubadda cagta.
Garsooraha Soomaaliyeed ayaa hore u soo maamulay kulamo ka tirsan Koobka Qaramada Afrika, waxaana loo arkaa inuu qarka u saaran yahay inuu noqdo garsoorihii ugu horreeyay ee Soomaaliyeed ee ka qayb gala Koobka Adduunka.
Martiqaadka uu ka helay Kuwait ayaa loo arkaa mid sii xoojinaya sumcadda iyo kaalinta ay garsoorayaasha Soomaaliyeed ku leeyihiin fagaarayaasha caalamiga ah ee kubadda cagta.
