Guddoomiyaha Maxkamadda Darajada 1aad ee Ciidamada Qalabka Sida, Korneyl Xasan Cali Nuur (Shuute), ayaa sheegay in maleeshiyada Al Shabaab aan loo hayn meel looga haro, maadaama aysan wadin wax diin ah, balse ay dhibaato ku hayaan shacabka Soomaaliyeed.
Korneyl Shuute, oo tan iyo dhammaadkii February ku sugan Gobolka Shabellaha Dhexe, ayaa si dhow uga qeyb qaadanaya hawlgalka lagu ciribtirayo Al Shabaab ee ka socda gobollada Hirshabelle.
Guddoomiyuhu ayaa Sabtidii dhiirigelin ugu tegay Ciidanka Difaaca Shacabka ee ku sugan deegaanka Miiro, halkaas oo uu uga digay in ay fursad siiyaan Al Shabaab.
“Qof walba waxaa gacantiisa ku jira qalinkii uu taariikhdiisa ku qori lahaa. Haddii aad qortid mid wanaagsan, taariikhdaasi wey kuu qormeysaa, haddii aad qortid mid xun, sidoo kale wey kuu qormeysaa,” ayuu yiri Korneyl Shuute.
Wuxuu intaa ku daray in dadka reer Hirshabelle ay horey ugu dhinteen dagaallo beeleed, balse maanta ay haystaan fursad ay uga badbaadi karaan dhibaatooyinka Al Shabaab.
“Dagaalka Al Shabaab waa mid guul leh”
Korneyl Shuute ayaa xusay in dagaalka lagula jiro Al Shabaab uu yahay mid loo dhammaanayo, maadaama ay haatan la dagaallamayaan shacabka, dowladda, iyo ciidanka qalabka sida.
“Suubanaheenna (NNKH) ayaa yiri: ‘Haddii aad Khawaarij disho, janno ayaad gashaa. Haddii ay ku dilaan, janno ayaad gashaa.’ Labada natiijo waa guul,” ayuu yiri.
Wuxuu sidoo kale dadka deegaanka uga digay inay rumeystaan in Al Shabaab ay diin wadaan, isagoo xusay in diinta Islaamka ay ka baxsan yihiin.
“Khawaarij waxa loo yiri, diinta ayay bannaanka ka yihiin. Sideedaba nimankaasi shacabkii ayaa diiday oo waa kan dadkii deegaanka, dowladdiina wey diidan tahay, ciidankuna wey la dirirayaan,” ayuu ku nuuxnuuxsaday.
Guddoomiyaha Maxkamadda Shuute: “Maxkamadii waan ka soo tagay, qoriga ayaan u soo qaatay dagaalka”
Guddoomiyuhu wuxuu sheegay in howshii uu maxkamadda ka hayay uu dib u dhigay, si uu dagaalka uga qeyb qaato.
“Waxaan u imid dagaalka anigoo qoriga wata. Waa inaan soo afjarnaa kooxdan,” ayuu yiri, isaga oo baaq u diray shacabka iyo ciidanka.
Korneyl Shuute ayaa maalmahanba booqanayay jiidaha dagaalka, isagoo shacabka u hogeeyey jihaadka lagula jiro Al Shabaab, taas oo muujineysa sida ay Dowladda Madaxweyne Xasan Sheekh Maxamuud uga go’an tahay ciribtirka Al Shabaab ee gobollada dalka.
📌 Wararka24 – Xog rasmi ah & Faahfaahin degdeg ah
