Wararka24: Madaxweynaha Somaliland, Cabdiraxmaan Maxamed Cabdullaahi (Cirro), ayaa lagu guddoonsiiyay Billad Sharafta Friends of Zion Award intii uu ku guda jiray booqasho uu ku joogo Israa’iil. Munaasabadda lagu maamuusay Madaxweynaha iyo wafdigiisa ayaa ka dhacday xarunta Matxafka Friends of Zion ee magaalada Jerusalem, halkaas oo loogu sameeyay casho-sharaf rasmi ah.
Billaddan ayaa loo aqoonsan yahay mid ka mid ah abaalmarinnada ugu caansan ee ay bixiso hay’adda Friends of Zion. Sida lagu sheegay war-saxaafadeed kasoo baxay Madaxtooyada Somaliland, abaalmarintan waxaa lagu maamuusaa hoggaamiyeyaal iyo shaqsiyaad ay Israa’iil u aragto inay door ku leeyihiin horumarinta xiriirrada iyo iskaashiga caalamiga ah.
Madaxtooyada Somaliland ayaa sheegtay in guddoonsiinta billaddan ay muujinayso heerka uu gaaray xiriirka u dhexeeya Somaliland iyo Israa’iil. Qoraalka ayaa sidoo kale xusay in abaalmarintan hore loo guddoonsiiyay madax iyo hoggaamiyeyaal caalami ah oo xilal sare kasoo qabtay dalalkooda.
War-saxaafadeedka ayaa intaas ku daray in billaddu ay ka tarjumayso iskaashiga sii kordhaya ee labada dhinac. Madaxtooyadu waxay sheegtay in xiriirkaasi uu salka ku hayo danaha wadajirka ah ee dhinacyada diblomaasiyadda, dhaqaalaha, horumarka iyo is-dhaafsiga aqoonta.
Dhanka kale, booqashada Madaxweynaha Somaliland ee Israa’iil ayaa si weyn indhaha loogu hayaa, iyadoo kusoo aadeysa xilli xiriirka labada dhinac uu yeeshay dhaqdhaqaaq diblomaasiyadeed oo sii xoogeysanaya. Arrintan ayaa dhalisay falcelinno kala duwan oo ka imanaya gudaha gobolka iyo meelo kale.
Falanqeeyayaasha arrimaha siyaasadda ayaa aaminsan in booqashada iyo maamuuska la siiyay Madaxweynaha Somaliland ay qayb ka yihiin dadaallada lagu xoojinayo xiriirka labada dhinac. Sidoo kale, waxay dhacdadani kusoo aadaysaa xilli ay sii socdaan doodaha la xiriira aqoonsiga Somaliland iyo saameynta uu ku yeelan karo xiriirka gobolka Geeska Afrika.
