Wararka24: Ciidanka Hay’adda Sirdoonka iyo Nabadsugidda Qaranka (NISA) ayaa sheegay inay gacanta ku dhigeen walxo kiimiko ah oo loo adeegsado samaynta qaraxyada, kuwaas oo sida ay hay’addu sheegtay loo waday kooxda Al-Shabaab.
War ka soo baxay NISA ayaa lagu sheegay in walxahaasi ay ka koobnaayeen in ka badan boqol jirgaan oo kiimiko ah, kuwaas oo lagu qabtay howlgal daba-gal iyo baaritaan socday muddo.
Hay’addu waxay sheegtay in walxahan lagu helay deegaanka Jilib Marka ee gobolka Shabeellaha Hoose, halkaas oo sida ay sheegtay Al-Shabaab ku duugtay kadib markii ay ogaatay in laamaha ammaanka ay la socdaan dhaq-dhaqaaqyadooda.
NISA ayaa xustay in qabashada walxahan ay qeyb ka tahay dadaallada lagu wiiqayo awoodda kooxda iyo sahayda ay u adeegsato fulinta weerarrada iyo falalka amni-darrada ee ka dhanka ah shacabka iyo ciidamada dowladda.
Sidoo kale, hay’addu waxay sheegtay in howlgalka uu muujinayo kororka dadaallada dhinaca sirdoonka iyo amniga ee lagu ogaanayo laguna burburinayo shabakadaha taageera kooxda Al-Shabaab.
Howlgalkan ayaa kusoo aadaya xilli ciidamada ammaanka Soomaaliya ay sare u qaadeen howlgallada ka dhanka ah Al-Shabaab, kuwaas oo lagu bartilmaameedsanayo xarumaha, sahayda iyo dhaq-dhaqaaqyada kooxda ee gobollada dalka.
Ma jirto weli wax war ah oo ka soo baxay Al-Shabaab oo ku saabsan walxaha kiimikada ah ee NISA sheegtay inay qabatay.
