Wararka24: Maamulka Gobolka Banaadir ayaa soo saaray go’aan cusub oo lagu mamnuucayo in lo’da lagu sii daayo waddooyinka magaalada Muqdisho, si loo xoojiyo nadaafadda, bilicda iyo badqabka caasimadda.
Afhayeenka Gobolka Banaadir, Saalax Xasan Cumar (Saalax Dheere), ayaa sheegay in go’aankan uu ka soo baxay Guddoomiyaha Gobolka Banaadir ahna Duqa Muqdisho, Xasan Maxamed Xuseen (Muungaab), kadib wada-tashi lala yeeshay qoysaska dhaqda lo’da iyo dhinacyo kale oo ay khuseyso arrintan.
Maamulka ayaa sheegay in lo’da lagu sii daayo waddooyinka ay sababto wasakh iyo nadaafad-darro ka dhalata saxarada xoolaha, taas oo saameyn ku yeelata caafimaadka bulshada isla markaana dhaawacda muuqaalka guud ee magaalada.
Sidoo kale, maamulka ayaa xusay in xoolaha waddooyinka lagu daayo ay carqaladeeyaan isu socodka gaadiidka, mararka qaarna ay sababaan shilal iyo ciriiri saameeya badqabka shacabka iyo gaadiidka isticmaala waddooyinka.
Mas’uuliyiinta gobolka ayaa sidoo kale tilmaamay in lo’du ay waxyeello u geysato geedaha iyo dhirta lagu beerayo magaalada, taas oo caqabad ku noqotay dadaallada lagu qurxinayo laguna dhiraynayo Muqdisho.
Guddoomiyaha Gobolka Banaadir ayaa amray in si buuxda loo mamnuuco lo’da lagu sii daayo waddooyinka caasimadda, iyadoo dadka dhaqda xoolaha la siiyay muddo laba toddobaad ah oo ka bilaabaneysa 16-ka Juun kuna eg 27-ka Juun 2026 si ay u xareeyaan xoolahooda.
Maamulka ayaa ka digay in tallaabooyin sharci ah laga qaadi doono cid kasta oo lagu helo inay lo’ ku sii daysay waddooyinka marka ay dhammaato muddada loo qabtay, wuxuuna ugu baaqay shacabka inay la shaqeeyaan hay’adaha dowladda si loo ilaaliyo nadaafadda iyo bilicda Muqdisho.
