Mogadishu, Soomaaliya – Guddoomiyaha gobolka Banaadir ahna duqa magaalada Muqdisho, ayaa maanta booqday goobaha uu burburka ba’an ka geystay roobkii xoogganaa ee habeenimadii hore ka da’ay caasimadda. Roobka oo socday saacado xiriir ah ayaa sababay daadad xooggan oo burburiyey guryo, waddooyin, iyo goobaha ganacsiga, gaar ahaan degmooyinka Hodan, Wadajir, Yaaqshiid, Dharkenley iyo Heliwaa.
Guddoomiyaha Banaadir ayaa kormeerkiisa ku bilaabay degmada Hodan, halkaas oo uu la kulmay dad ay guryahoodii dumaan ama biyuhu galeen. Wuxuu sheegay in maamulka gobolka uu si degdeg ah uga jawaabi doono dhibaatada, lana sameynayo qorshe gurmad degdeg ah. “Waxaan idiin balanqaadaynaa inaan idin garab istaagno, aanna howlgal ballaaran ka fulin doonno dhammaan meelaha ay dhibaatadu ka jirto,” ayuu yiri guddoomiyuhu isagoo la hadlayay dadkii ay saameeyeen daadadka.
Intii uu socday booqashada, Guddoomiyuhu wuxuu la kulmay mas’uuliyiinta degmooyinka iyo laamaha ammaanka si loo dardargeliyo dadaallada samatabbixinta. Wuxuu sidoo kale sheegay in roobka intuu socday ee ku dhinteen dad gaaraya 11 qof sidokale dad badan ayaa ku barakacay, waxaana la xusay in carruur iyo haween ay si gaar ah u saameeyeen daadadku.
Roobabkan oo ka duwan kuwii hore ayaa la sheegay inuu si gaar ah u muujiyey baahida loo qabo nidaam biyo mareen oo casri ah. Guddoomiyuhu wuxuu sheegay in dowladda hoose ay dardar gelin doonto mashruucyo la xiriira dhismaha biyo mareennada, si looga hortago masiibooyinka noocan oo kale ah mustaqbalka.
Sidoo kale, wuxuu ugu baaqay bulshada inay iska kaashadaan ilaalinta nadaafadda deegaanka, si loo yareeyo xannibaadda ay biyuhu ku dhacaan. “Dadka qaar ayaa tuura qashinka biyo mareennada, taasina waxay sababtaa in roobabku ay biyo xireen noqdaan,” ayuu yiri.
Ugu dambayn, guddoomiyaha gobolka Banaadir ayaa ugu baaqay hay’adaha samafalka iyo dowladda dhexe in ay ka qayb qaataan gurmadka iyo dib u dhiska, si dadka waxyeelladu soo gaartay ay dib ugu helaan nolol caadi ah.
Wararka24 – Xog rasmi ah oo faahfaahin degdeg ah
