Wararka24: Madaxweynaha cusub ee Dowlad-goboleedka Koonfur Galbeed Soomaaliya, Sheekh Aadan Maxamed Nuur (Aadan Madoobe), ayaa maanta si rasmi ah ula wareegay xilka, kadib markii uu ku guuleystay doorashadii shalay ka dhacday magaalada Baydhabo.
Munaasabad kooban oo lagu qabtay xarunta Madaxtooyada Koonfur Galbeed ayaa lagu qabtay xil wareejinta, iyadoo hoggaamiyihii ku-meel-gaarka ahaa ee xilka sii hayay, Jibriil Cabdirashiid Xaaji Cabdi, uu si rasmi ah ugu wareejiyay masuuliyadda maamulka.
Xafladda xil wareejinta waxaa ka qeyb galay masuuliyiin ka tirsan Dowladda Federaalka Soomaaliya, maamulka Koonfur Galbeed, xubno ka socday hay’adaha dowladda, siyaasiyiin, odayaal dhaqameed iyo marti sharaf kale.
Intii ay socotay munaasabadda, Jibriil Cabdirashiid Xaaji Cabdi ayaa ku wareejiyay Madaxweynaha cusub dukumiintiyada iyo masuuliyadaha xafiiska, isaga oo ugu hambalyeeyay xilka loo doortay una rajeeyay guul iyo horumar.
Madaxweyne Aadan Madoobe ayaa dhankiisa uga mahadceliyay masuuliyiintii xilka sii waday shaqadii ay qabteen muddadii kala guurka. Wuxuu ballanqaaday inuu xoogga saari doono nabadda, horumarinta adeegyada bulshada iyo xoojinta hay’adaha dowlad-goboleedka.
Doorashadii ka dhacday Baydhabo ayaa Aadan Madoobe ku helay 88 cod, taas oo u sahashay inuu noqdo hoggaamiyaha cusub ee Koonfur Galbeed Soomaaliya.
Xil wareejintan ayaa kusoo aadeysa xilli ay jiraan dooddo siyaasadeed iyo aragtiyo kala duwan oo ku saabsan hannaanka doorashada, iyadoo qaar ka mid ah siyaasiyiinta mucaaradka ay hore uga muujiyeen walaac ku aaddan qaabka loo maareeyay geeddi-socodka doorashada.
Maamulka cusub ayaa hadda wajahaya masuuliyado ay ka mid yihiin sugidda amniga, horumarinta adeegyada bulshada iyo xoojinta wada shaqeynta kala dhexeysa Dowladda Federaalka Soomaaliya iyo bulshada deegaannada Koonfur Galbeed.
