Wararka24: Xaalada degmada Cabdicasiis ee gobolka Banaadir, gaar ahaan deegaanka Mirinaayo ayaa weli kacsan, halkaas oo ay ku sugan yihiin ciidamo kala duwan kadib dhacdooyinkii amni ee maalmihii la soo dhaafay ka dhacay degmadaas.
Wararka la helayo ayaa sheegaya in xiisaddu ay u dhexeyso ciidamada dowladda iyo ciidamo ilaalo u ah Taliyihii hore ee Ciidanka Xoogga Dalka Soomaaliyeed Jeneraal Odowaa Yuusuf Raage. Dhaqdhaqaaqyada ciidanka ayaa la sheegay inay sare u kaceen kadib muran la xiriira baaritaanno ay ciidamada ammaanku ka wadaan deegaanka.
Ilo deegaanka ku sugan ayaa sheegay in ciidamada dowladda ay wadaan howlgallo lagu baarayo guryo ku yaalla aaggaasi laguna arurinayo hubka sharci darada ah. Wararka ayaa intaas ku daraya in ciidamada ilaalada u ah Odowaa ay diideen in la baaro gurigiisa, taas oo keentay khilaafka labada, cidamada aya laguso waramaya inay is horfadhiyaan.
Taliska Qaybta Guud ee Booliska Gobolka Banaadir ayaa warsaxaafadeed uu soo saaray ku sheegay in howlgalka socda uu yahay mid lagu ururinayo hub sharci darro ah. Booliska ayaa sheegay in hubkaasi lala xiriirinayo kooxo ku lug lahaa iska horimaadyo dhowaan ka dhacay degmada Cabdicasiis.
Qoraalka taliska ayaa sidoo kale lagu sheegay in hay’adaha ammaanku ay tallaabooyin sharci ah ka qaadi doonaan cid kasta oo lagu helo hub sharci darro ah ama lagu tuhmo inay ku lug leedahay kaydintiisa iyo dhaqdhaqaaqiisa. Dadweynaha ayaa loogu baaqay inay la shaqeeyaan laamaha ammaanka si loo xoojiyo nabadgelyada.
Dhanka kale, xaaladda degmada Cabdicasiis ayaa weli saamayn ku leh dadka deegaanka, iyadoo qaar ka mid ah qoysaskii ka barakacay goobaha ay xiisaddu ka jirto aysan weli dib ugu laaban guryahooda. Mas’uuliyiinta ammaanka ayaa sheegay inay wadaan dadaallo lagu xaqiijinayo deganaanshaha iyo amniga deegaanka.
