Wararka24: Agaasimaha Guud ee Xarunta Qaran ee TUBSAN, Cali Yaasin Gurbe, ayaa loo doortay xubinnimada guddiga sare ee hay’adda caalamiga ah ee GCERF, taas oo taageerta dadaallada lagu xoojinayo adkeysiga bulshada iyo ka hortagga xagjirnimada rabshadaha leh.
Doorashadan ayaa ka dhacday shir heer sare ah oo ay hay’addu ku qabatay magaalada Geneva ee dalka Switzerland, halkaas oo ay isugu yimaadeen wakiillo iyo mas’uuliyiin ka socday dalal kala duwan oo ku yaalla Afrika, Yurub, Aasiya iyo Bariga Dhexe. Kulanka ayaa diiradda lagu saaray xoojinta iskaashiga caalamiga ah iyo taageerada bulshooyinka la tacaalaya caqabadaha amni iyo horumarineed.
Cali Yaasin Gurbe ayaa xilkan kala wareegay Kibiego Rotich oo ka socday Kenya, kaas oo muddo metelayay dalalka Soomaaliya, Kenya iyo Mozambique ee guddiga sare ee GCERF. Tallaabadan ayaa ka dhigan in Soomaaliya dib u soo ceshatay metelaaddeedii tooska ahayd ee hay’adda, kadib sannado ay wakiilladu uga imaanayeen dalal kale.
Mas’uuliyiinta dowladda ayaa doorashadan ku tilmaamay guul muhiim ah oo muujinaysa kororka kaalinta Soomaaliya ee fagaarayaasha caalamiga ah. Waxa ay sheegeen in xubinnimada cusub ay dalka siinayso fursad uu si dhow uga qayb qaato dejinta siyaasadaha iyo qorshayaasha la xiriira adkeysiga bulshada iyo ka hortagga xagjirnimada.
GCERF ayaa caan ku ah taageerada ay siiso barnaamijyada lagu xoojinayo ka qaybgalka bulshada, horumarinta nabadda iyo yaraynta khataraha la xiriira rabshadaha iyo fikirrada xagjirka ah. Hay’addu waxay si gaar ah ula shaqeysaa dalalka wajahaya caqabado amni iyo kuwo dowladnimo.
Xarunta Qaran ee TUBSAN ayaa sanadihii la soo dhaafay hormuud ka ahayd dadaallo lagu xoojinayo xasilloonida bulshada iyo ka hortagga xagjirnimada gudaha Soomaaliya. Doorashadan cusub ayaa la filayaa inay sii kordhiso doorka ay Soomaaliya ku leedahay wada shaqeynta caalamiga ah ee dhinacyada nabadda iyo amniga.
Shirka xiga ee guddiga sare ee GCERF ayaa lagu wadaa in lagu qabto magaalada Tokyo ee dalka Japan, halkaas oo xubnaha cusub ay si rasmi ah uga bilaabi doonaan waajibaadkooda.
