Wararka24: Madaxweynaha Mareykanka Donald Trump ayaa Arbacadii ku hanjabay in uu “dhulka la simi doono” dalka Oman haddii uu kala safdo Iran arrinta la xiriirta marin-biyoodka Hormuz, xilli ay sii kordhayaan xiisadaha Bariga Dhexe.
Trump ayaa hadalkan ka sheegay shirka golaha wasiirrada uu kula yeeshay Aqalka Cad, kadib markii la weydiiyay haddii uu aqbali doono heshiis ku meel-gaar ah oo Iran iyo Cumaan ay si wadajir ah ugu maamulayaan marin-biyoodka Hormuz.
“Maya, marin-biyoodka waa inuu u furnaadaa qof kasta,” ayuu yiri Trump. “Waa biyo caalami ah, Cumaan-na waxay u dhaqmi doontaa sida dadka kale oo dhan, haddii kale waa inaan qarxinnaa.”
Hadalka Trump ayaa si weyn u soo jiitay dareenka caalamka, maadaama Cumaan ay tahay xulufo muhiim u ah Mareykanka, isla markaana muddo dheer door dhexdhexaadin ah ka ciyaareysay xiisadaha u dhexeeya Washington iyo Tehran.
Warbaahinta caalamka qaarkeed ayaa markii hore shaki gelisay in Trump uu si khaldan u magacaabay Cumaan halkii uu ka sheegi lahaa Iran, balse Wasaaradda Arrimaha Dibadda Mareykanka ayaa markii dambe baahisay muuqaalka iyo qoraalka hadalka Trump iyada oo aan wax sixitaan ah sameyn.
Xiisaddan cusub ayaa salka ku haysa muranka ka taagan marin-biyoodka Hormuz, oo ah marin-biyoodka ugu muhiimsan dhoofinta shidaalka caalamka, halkaas oo ay maraan ku dhowaad shan meelood shidaalka adduunka.
Wararka ayaa sheegaya in Iran ay dooneyso inay saameyn cusub ku yeelato marin-biyoodka Hormuz, iyadoo la sheegay inay qorsheyneyso in maraakiibta halkaas maraya laga qaado lacag marin ah, taas oo la sheegay inay Cumaan qayb ka noqon karto.
Dhanka kale, Mareykanka ayaa sheegay inuu howlgallo militari ka fuliyay gudaha Iran, gaar ahaan meel u dhow Bandar Abbas, halkaas oo lagu bartilmaameedsaday xarumo lagu maamulayay diyaarado aan duuliye lahayn.
Ilaa hadda dowladda Cumaan si rasmi ah ugama jawaabin hadalka kasoo baxay Trump, inkastoo hadalkaasi uu sii kordhiyay walaaca laga qabo in xiisadda Bariga Dhexe ay kasii darto.
