Wararka24: Go’aanka Somaliland ee ah inay safaarad ka furato magaalada Qudus ayaa si weyn uga dhex abuuray dood siyaasadeed iyo mid diblomaasiyadeed gudaha Soomaalida iyo guud ahaan dunida Islaamka. Tallaabadan ayaa loo arkaa mid ka baxsan raadinta aqoonsiga caalamiga ah ee Somaliland muddada dheer waday.
Somaliland ayaa tan iyo sanadkii 1991 ku doodeysay inay tahay dal madax-bannaan, balse weli ma aysan helin aqoonsi rasmi ah oo caalami ah. Dowladda Israa’iil ayaa noqotay dalkii ugu horreeyay ee si rasmi ah u aqoonsada Somaliland, arrintaas oo dhalisay falcelin xooggan oo ka timid dowladda Federaalka Soomaaliya iyo dalal kale oo Carbeed oo Islaami ah.
Falanqeeye Maxamed Ibraahim oo ka hadlay arrintan ayaa sheegay in furitaanka safaarad laga sameeyo Qudus uusan ahayn tallaabo diblomaasiyadeed oo caadi ah, balse uu yahay mowqif siyaasadeed oo si toos ah u taageeraya sheegashada Israa’iil ee magaaladaasi. Wuxuu tilmaamay in dalal badan oo caalamka laga aqoonsan yahay ay weli ka fogaadeen inay safaarado ka furtaan Qudus sababo la xiriira muranka ka taagan magaalada.
“Somaliland waxay u muuqataa inay aqoonsi ku raadineyso qiime siyaasadeed oo aad u culus,” ayuu yiri falanqeeyaha. Wuxuu intaas ku daray in tallaabadaasi ay dhaawici karto xiriirka Somaliland ay la leedahay dunida Muslimka iyo dalalka Carabta oo muddo dheer taageersanaa qadiyadda Falastiin.
Qudus ayaa ka mid ah magaalooyinka ugu muranka badan caalamka, iyadoo Falastiiniyiintu doonayaan in Bariga Qudus noqoto caasimaddooda mustaqbalka, halka Israa’iil ay magaalada oo dhan u aqoonsan tahay caasimaddeeda. Sababtaas darteed, inta badan dalalka adduunka waxay safaaradahooda ku leeyihiin Tel Aviv halkii ay geyn lahaayeen Qudus.
Dadka taageersan xiriirka Somaliland iyo Israa’iil ayaa ku doodaya in Hargeysa ay xaq u leedahay inay raadiso saaxiibo cusub oo diblomaasiyadeed, maalgashi iyo iskaashi amni. Si kastaba, dadka kasoo horjeeda waxay sheegayaan in arrinta Qudus aysan ahayn mid lagu gorgortami karo, maadaama ay xambaarsan tahay culays diimeed iyo mid siyaasadeed oo weyn.
Go’aankan ayaa sidoo kale sii kordhin kara xiisadda u dhexeysa Muqdisho iyo Hargeysa, iyadoo dowladda Federaalka Soomaaliya ay si adag uga hortimid aqoonsiga Israa’iil siisay Somaliland iyo qorshaha safaaradda Qudus.
