Wararka24: Maamulka Gobolka Banaadir iyo hay’adaha ammaanka dowladda Soomaaliya ayaa kordhiyay howlgalada lagu sugayo amniga magaalada Muqdisho, kadib kulamo amni oo dhawaan ka dhacay caasimadda. Tallaabadan ayaa lagu sheegay mid looga hortagayo falal amni darro iyo isku dayo lagu qalqal gelinayo xasilloonida magaalada.
Guddoomiye ku xigeenka amniga iyo siyaasadda Gobolka Banaadir Maxamed Axmed Diiriye Yabooh ayaa xalay kormeer ku tagay degmooyinka Yaaqshiid iyo Warta Nabadda, halkaas oo uu kula kulmay mas’uuliyiinta degmooyinka iyo saraakiisha hay’adaha ammaanka. Kormeerka ayaa diiradda lagu saaray xaaladda amniga iyo sidii loo kordhin lahaa feejignaanta ciidamada.
Yabooh ayaa sheegay in kulamadii amniga ee dhowaan dhacay lagu go’aamiyay in maamullada degmooyinka iyo ciidamada ammaanka la geliyo heegan buuxa, si habeen iyo maalin looga shaqeeyo sugidda amniga shacabka Muqdisho. Wuxuu tilmaamay in qorshahan uu qeyb ka yahay dadaallada dowladda ee lagu xoojinayo nabadda iyo kala dambeynta caasimadda.
Guddoomiye ku xigeenka ayaa sidoo kale sheegay in shacabka ay door muhiim ah ku leeyihiin ilaalinta amniga, isaga oo bogaadiyay wada shaqeynta ay muujiyeen dadka ku nool degmooyinka uu kormeerka ku tagay. Waxa uu xusay in bulshada ay muujiyeen kalsooni la xiriirta horumarka dhinaca amniga ee magaalada Muqdisho.
Dowladda Federaalka Soomaaliya ayaa muddooyinkii dambe kordhisay howlgalada ammaanka, iyadoo laamaha ammaanka ay xoojiyeen dhaq dhaqaaqyada lagu xaqiijinayo xasiloonida magaalada. Saraakiisha dowladda ayaa sheegay in qorshayaasha cusub ay qeyb ka yihiin dadaallada looga hortagayo khataraha amni ee ka imaan kara kooxaha hubeysan iyo falalka lagu carqaladeynayo nabadda caasimadda.
Howlgaladan iyo heeganka cusub ayaa kusoo aadaya xilli Muqdisho ay martigelineyso kulamo siyaasadeed iyo dhaqdhaqaaqyo kala duwan oo muhiim u ah xaaladda dalka.
