Wararka24: Madaxweynaha Jamhuuriyadda Federaalka Soomaaliya, Xasan Sheekh Maxamuud ayaa maanta kulan kula yeeshay magaalada Muqdisho safiirka dowladda Turkiga ee Soomaaliya, Alper Aktaş, saacado kadib markii ay fashilmeen wada-hadalladii dowladda iyo Golaha Mustaqbalka Soomaaliyeed.
Kulanka ayaa diiradda lagu saaray xoojinta xiriirka labada dal, gaar ahaan dhinacyada amniga, dhaqaalaha iyo taageerada Turkiga uu siiyo dowladda federaalka Soomaaliya. Dowladda Turkiga ayaa kamid ah saaxiibada ugu waaweyn ee Soomaaliya ka taageera dib u dhiska hay’adaha dowladda iyo ciidamada.
Safiirka Turkiga ayaa sheegay in Ankara ay sii wadi doonto taageerada ay la garab taagan tahay dowladda Soomaaliya, xilli ay taagan tahay xiisad siyaasadeed oo u dhexeysa Villa Soomaaliya iyo siyaasiyiinta mucaaradka ee xiriirka la leh maamullada Puntland iyo Jubaland.
Dhankiisa, Madaxweyne Xasan Sheekh ayaa uga mahadceliyay dowladda Turkiga kaalinta ay ka qaadato taageerada amniga, tababarka ciidamada iyo mashaariicda horumarineed ee dalka ka socda, isaga oo tilmaamay muhiimadda ay leedahay iskaashiga labada dhinac.
Kulankan ayaa kusoo aaday kadib markii ay natiijo la’aan kusoo dhammaadeen wada-hadalladii dowladda iyo mucaaradka ee ka socday xerada Xalane, kuwaas oo ay garwadeen ka ahaayeen xubno ka tirsan beesha caalamka.
Mucaaradka ayaa weli ku adkeysanaya in muddo xileedka dowladda uu dhammaaday, halka Madaxweyne Xasan Sheekh uu sheegay in muddo xileedka dowladda iyo baarlamaanka uu ku egyahay 15-ka May 2027, sida uu dhigayo dastuurka cusub ee la dhaqan geliyay.
Xiisadda siyaasadeed ee dalka ayaa weli taagan, waxaana laga cabsi qabaa in fashilka wada-hadallada uu sii kordhiyo khilaafka ka dhex jira dowladda federaalka iyo mucaaradka siyaasadeed.
