Wararka24: Madaxweynaha Shiinaha, Xi Jinping ayaa uga digay dhiggiisa Mareykanka, Donald Trump in faragelin lagu sameeyo arrinta Taiwan uu horseedi karo isku dhac halis ah oo dhex mara labada quwadood ee waaweyn.
Xi Jinping ayaa hadalkan ka sheegay shir madaxeed ka dhacay magaalada Beijing, halkaas oo labada hoggaamiye ay ku yeesheen wada-hadallo socday in ka badan laba saacadood, iyadoo diiradda lagu saaray xiriirka siyaasadeed, dhaqaalaha iyo amniga gobolka.
Madaxweynaha Shiinaha ayaa sheegay in Taiwan ay tahay qodobka ugu xasaasisan ee xiriirka Shiinaha iyo Mareykanka, isaga oo carrabka ku adkeeyay in haddii si khaldan loo maareeyo arrintaasi ay labada dal geli karaan xaalad khatar ah.
“Haddii si qaldan loo maareeyo arrinta Taiwan, labada dal waxay geli karaan isku dhac ama xitaa dagaal,” ayuu yiri Xi Jinping, sida ay baahisay warbaahinta dowladda Shiinaha.
Dhankiisa, Donald Trump ayaa Xi Jinping ku tilmaamay “hoggaamiye weyn” iyo “saaxiib”, isaga oo muujiyay rabitaanka Mareykanka ee xoojinta xiriirka dhaqaale iyo iskaashiga labada dal.
Labada hoggaamiye ayaa sidoo kale ka wada hadlay xaaladda Bariga Dhexe, gaar ahaan xiisadda Iran iyo marin biyoodka Hormuz, iyagoo isku raacay muhiimadda ay leedahay in la ilaaliyo socodka xorta ah ee tamarta caalamka.
Wararka kasoo baxaya wada-hadallada Beijing ayaa muujinaya in Shiinuhu diyaar u yahay wada-shaqeyn dhinacyo badan leh, balse uusan wax tanaasul ah ka sameyn doonin arrinta Taiwan oo Beijing ay u aragto qayb ka mid ah dhulkeeda.
Dhanka kale, Taiwan ayaa sheegtay inay si dhow ula socoto wada-hadallada u dhexeeya Washington iyo Beijing, iyadoo mas’uuliyiinta Taipei ay sheegeen inaysan jirin wax isbeddel weyn ah oo kasoo baxay kulanka labada madaxweyne.
Xiriirka u dhexeeya Mareykanka iyo Shiinaha ayaa muddooyinkii dambe wajahaya xiisado la xiriira Taiwan, ganacsiga, teknoolojiyadda iyo saameynta gobolka Asia-Pacific, iyadoo labada dal ay isku dayayaan inay ka fogaadaan isku dhac toos ah oo militari.
