Wararka24: Cabdicasiis Xasan Maxamed Lafta-gareen ayaa si adag uga horyimid doorashooyinkii dhowaan ka dhacay deegaanada maamulka Koonfur Galbeed, isaga oo ku tilmaamay kuwo aan sharciyad lahayn oo baal marsan dastuurka iyo nidaamka federaalka dalka.
Lafta-gareen ayaa sheegay in Koonfur Galbeed ay leedahay hay’ado dowladeed oo sharci ah, isla markaana uu jiro madaxweyne si dastuur ah loo doortay, sidaas darteedna aan loo baahnayn hannaan kale oo uu ku tilmaamay mid lagu carqaladeynayo maamulka jira.
Qoraal uu soo saaray ayuu ku sheegay in cid kasta oo isku dayaysa inay qabato doorasho ama ay dhisto maamul cusub ay ku xadgudbeyso nidaamka federaalka, midnimada shacabka iyo xasilloonida siyaasadeed ee Soomaaliya.
Sidoo kale, wuxuu eedeyn culus u jeediyay ciidamada Dowladda Federaalka ee ku sugan deegaanada maamulkaas, isaga oo sheegay in shacabka rayidka ah ay kala kulmayaan cabsi iyo xadgudubyo sharci darro ah.
Lafta-gareen ayaa ugu baaqay shacabka Soomaaliyeed iyo beesha caalamka inay ka feejignaadaan waxa uu ku tilmaamay olole marin habaabin ah oo lagu qaldayo bulshada, wuxuuna ku adkeystay in la ixtiraamo madax-bannaanida iyo hay’adaha rasmiga ah ee Koonfur Galbeed.
Dhanka kale, Dowladda Federaalka Soomaaliya ayaa horay u sheegtay in doorashooyinka qof iyo cod ee ka dhacay 13 degmo oo ka tirsan Koonfur Galbeed ay ahaayeen kuwo si nabad ah ku qabsoomay, isla markaana ay shacabka si weyn uga qeyb qaateen.
Doorashadaasi ayaa lagu doortay goleyaasha deegaanka iyo baarlamaanka maamulka, iyadoo guddiga doorashooyinka uu shaaciyay in xisbiga JSP uu helay kuraasta ugu badan ee golaha wakiilada.
Khilaafka ka dhashay doorashada Koonfur Galbeed ayaa kusoo aadaya xilli dalka uu wajahayo muran siyaasadeed oo la xiriira hannaanka doorashooyinka iyo wax ka beddelka dastuurka, arrimahaas oo ay si weyn isugu hayaan dowladda federaalka iyo mucaaradka.
